Ṋari ṱhukhu yo vuwa nga thungo hu sili kha tshipiḓa tshi re na hatsi eneo matsheloni. A yo ngo eḓela zwavhuḓi madekwe. Vhusiku hoṱhe yo pfa mibvumo i tshuwisaho zwihulu ḓakani. U thomani yeneyo mibvumo yo vha i tshi pfalela kule, fhedzi ya ḓi sendela nga zwiṱuku nga zwiṱuku. Yo pfala u nga ndi u kuma na u unga ha thumbu ya Makhulu Vho-Nḓou musi vho farwa nga nḓala!

Ano matsheloni zwi tou nga a hu na ṋari na nthihi yo pfaho mubvumo. Naho Ṋari Ṱhukhu yo vha i ṱhukhu vhukuma kha sambi ḽa ṋari, a yo ngo vhudzisa dziṅwe ṋari ṱhukhu arali dzo pfa wonoyo mubvumo! Yo vha i tshi ḓo zwi mini arali dza humbula uri ndi goswi nahone dza i sea? Ṋari Ṱhukhu yo ṱwa matsheloni oṱhe i tshi khou ḓivhudzisa uri wonoyo mubvumo wa u kuma na u unga u nga vha wo vha u wa mini. Makhulu Vho-Nḓou vho vha vha tshi khou ḓiṱafunela maṱari a mupani musi Ṋari Ṱhukhu i tshi vha pfuka yo livha tivhani hune ha nwiwa hone maḓi.

“Makhulu Vho-Nḓou, naa ndi thumbu yavho ye ya vha i tshi khou kuma na u unga madekwe lwe zwa pfala u buḓa na ḓaka?” hu vhudzisa Ṋari Ṱhukhu. “Hai wee, inwi Ṋari Ṱhukhu. Ho vha hu si nṋe. Thumbu yanga yo thoma zwino u kuma na u unga musi ḽi tshi ṱavha ano matsheloni,” hu fhindula Makhulu Vho-Nḓou. Ndi izwi-ha vha tshi mbo ḓi rembuluwa vha ḓiṱutshela, vha livha mirini milapfu. Musi Ṋari Ṱhukhu i tshi swika tivhani hune ha nwiwa hone maḓi, ya wana Makhadzi Vho-Mvuvhu vho ḓiṱana ḓuvhani. “Makhadzi Vho-Mvuvhu, naa vha nga vha vho pfa mubvumo wa u kuma na u unga madekwe?” hu vhudzisa Ṋari Ṱhukhu. “Hai wee, inwi Ṋari Ṱhukhu. Nḓevhe dzanga dzo vha dzo ṋupela maḓini. A tho ngo pfa tshithu u tou amba ngoho,” hu fhindula Makhadzi Vho-Mvuvhu. Ndi izwi-ha yeneyo mvuvhu i tshi alamula zwihulu, ya bonya maṱo ya mbo ḓi vhukofhe zhambu eneo masiari.

Ṋari Ṱhukhu ya ṱwa masiari oṱhe i tshi khou ḓivhudzisa uri wonoyo mubvumo wa u kuma na u unga u nga vha wo vha u wa mini. Ya vhudzisa vhoṱhe vhe ya ṱangana navho arali vho pfa wonoyo mubvumo, fhedzi zwa vhonala u nga ho vha hu si na na muthihi we a u pfa. “Inwi Ṋari Ṱhukhu, khamusi no vha ni tshi khou tou lora zwaṋu,” ha fhindula Mma Vho-Ṋari musi a tshi vha vhudzisa. Zwi khagala uri Mma Vho-Ṋari vho vha vha tshi ḓo zwi ḓivha ngauri Ṋari Ṱhukhu yo vha yo eḓela tsini navho. Musi ḓuvha ḽi tshi vho kovhela, tsha vha tsho swika tshifhinga tsha uri Ṋari Ṱhukhu na dziṅwe ṋari dzoṱhe dzi lugele u eḓela hatsini vhutete eneo madekwana. Ṋari Ṱhukhu yo vha i tshi kha ḓi tou bva u fara khofhe musi tshi tshi mbo ḓi vukuluku. A hu na na zwiṅwe, yo dovha ya pfa u kuma na u unga! U thomani wonoyo mubvumo wa u kuma na u unga wo pfala u kule, fhedzi wa ḓi sendela nga zwiṱuku nga zwiṱuku.

Wa bvela phanḓa u tshi engedzea! Kubilu kwa Ṋari Ṱhukhu kwa divhitha nga luvhilo sa ngoma. Ya ṱinga-ṱinga u vhona arali dziṅwe ṋari dzo pfa wonoyo mubvumo, fhedzi ṋari dzoṱhe dzo vha dzo fa nga khofhe. Na Mma Vho-Ṋari vho vha vho farwa nga khofhe khulu, vha sa tsukunyei na luthihi. Ṋari Ṱhukhu yo vha yo tshuwa. Ya ḓi endela u pfa mubvumo wa u kuma na u unga hoṱhe hune ya vha hone. Ndi izwi-ha i tshi pfa, … THOO! Ṋari Ṱhukhu ya rothelwa nga tshithu tsha luḓi ningoni! Thoo, thoo, thoo! Ha rotha mashotha manzhi a mvula.

Ṋari Ṱhukhu ya lilala. Ha rotha mashotha mahulwane u bva makoleni. Ṋari Ṱhukhu ya ḓisea nga ipfi ḽihulwane ... hu na zwiṅwe lini ... heyi ndi mvula. Lwo vha lu lwa u thoma i tshi vhona mvula! U kuma na u unga zwe ya zwi pfa ho vha hu mubvumo wa mvula! Yo vha i songo tea u ofha.

Zwenezwo zwa ita uri Ṋari Ṱhukhu i dzike, ya ḓikuvhatedza tsini na muvhili u dudelaho wa Mma Vho-Ṋari. Ya thetshelesa musi mashotha a mvula a tshi nela maṱari na hatsi, ya mbo ḓi farwa khofhe.

Itani uri tshiṱori tshi nyanyule!

•  Naa ni kha ḓi zwi humbula musi ni tshi pfa mubvumo u tshuwiwaho? No ita mini? Wo vha u mubvumo wa mini?
•  Olani tshifanyiso tsha Ṋari Ṱhukhu na Makhadzi Vho-Mvuvhu. Olani maipfi a re kha pulo o ambiwaho nga Ṋari Ṱhukhu na maṅwe o ambiwaho nga Makhadzi Vho-Mvuvhu.
• Kopani maipfi a tshiṱori ane a ambiwa nga mubvumbedzwa muṅwe na muṅwe kha tshipitshi tshawe tshi re kha mapulo.
• Humbulani nga ha mvula. Ṅwalani tshirendo tshine tsha ṱalusa nḓila ine mubvumo wa mvula wa vha ngayo, munukho na nḓila ine ya vha ngayo kha lukanda.