Nare yo Monyenyane o tsogile ka lehlakoreng le le fošagetšego la bjang mesong yeo. Ga se a robala gabotse bošegong bja go feta. Bošego ka moka, o kwele medumo ya go tšhoša kudu dithokgweng. Mathomong, medumo yeo e be e le kgole, eupša ya batamela kgauswi kudu. E be e kwagala bjalo ka mala a Rakgolo Tlou ge a swerwe ke tlala! Mesong ye go be go bonala dinare tše dingwe di sa kwa medumo yeo. Le ge Nare yo Monyenyane e be e le yena yo monyenyane mohlapeng wa dinare, o be a sa ikemišetša go botšiša dinare tše dingwe tše dinyenyane ka modumo woo! Go thwe’ng ge di ka nagana gore ke lefšega gomme tša mo kwera? Mesong yeo ka moka, Nare yo Monyenyane o be a duletše go ipotšiša gore modumo woo e be e le wa eng. Rakgolo Tlou o be a itshohlela matlakala a mohlare wa mopane ka khutšo ge Nare yo Monyenyane a feta kgauswi le yena a lebile sedibeng. “Rakgolo Tlou, naa ke mala a gago ao a bego a dira lešata bošegong bja maabane moo a bego a kwagala sethokweng ka moka?” gwa botšiša Nare yo Monyenyane.

“Aowa, Nare yo Monyenyane. E be e se mala a ka. Mala a ka a thomile go dira lešata ge letšatši le hlaba mesong ye,” gwa realo Rakgolo Tlou. Ke moka a retologa a leba dihlareng tše ditelele. Kua sedibeng, Nare yo Monyenyane o ile a hwetša Mmane Kubu a othetše letšatši. “Mmane Kubu, naa o kwele lešata la maabane?” gwa botšiša Nare yo Monyenyane. “Aowa, Nare yo Monyenyane. Ditsebe tša ka di be di le ka fase ga meetse. Ga se ka kwa selo,” gwa realo Mmane Kubu. Ke moka a ahlamiša molomo wa gagwe o mogologolo le go tswalela mahlo gore a bo re šwaa.

Mosegare ka moka Nare yo Monyenyane a ipotšiša gore modumo woo e be e le wa eng. O ile a botšiša bohle bao a bego a kopana le bona gore naa ba kwele modumo woo, eupša go bonala go se yo a o kwelego. “Mohlomongwe o be o lora, Nare yo Monyenyane,” gwa realo Mmago Nare ge a se no mmotšiša. E bile Mmagwe o be a tla tseba ka gobane Nare yo Monyenyane o be a robetše kgauswi le yena. Ge letšatši le se no tshela mokokotlo wa kgomo, e be e le nako ya gore Nare yo Monyenyane le dinare tše dingwe ba patlame bjanyeng gore ba robale. Nare yo Monyenyane o be a sa tšwa go robala ge a tsoga ka ponyo ya leihlo.

Ntle le pelaelo, o kwele modumo wola gape! Mathomong, modumo woo o be o kwagalela kgole, eupša ka morago wa kwagalela kgauswi kudu. O ile wa oketšega le go feta! Pelo ya Nare yo Monyenyane e ile ya itia bjalo ka moropa. O ile a lebelela go mo dikologa go bona ge e ba dinare tše dingwe di kwele modumo woo, eupša ka moka di be di ile ka boroko. Gaešita le Mmagwe o be a ile ka boroko. Nare yo Monyenyane o ile a tšhoga kudu. Modumo woo o be o kwagala kgauswi le yena go mo dikologa. Ke moka, … THO! Selo se sengwe sa go thapa se ile sa wela nkong ya Nare yo Monyenyane! Tho, tho, tho! Go ile gwa tšwelela marothi a mangwe a oketšegilego.

Nare yo Monyenyane o ile a lebelela godimo. Marothi a magolo a meetse a be a tšhologa go tšwa legodimong. Nare yo Monyenyane o ile a itshega ka go hlaboša ... ee ... e be e le pula. O be a thoma go bona pula! Gomme modumo wo a bego a o kwa e be e no ba maduma a pula! Go be go se na lebaka la go tšhoga. A theošitše maswafo, Nare yo Monyenyane o ile a ipatametša kgauswi le mmele wa Mmagwe o borutho. O ile a theeletša modumo wa pula ge e dutše e wela godimo ga matlakala le bjang ka nakwana, ke moka a ikela ka boroko a lebala tšohle.

Dira gore kanegelo e be le bophelo!

• Naa o sa gopola ge o be o ekwa modumo wa go tšhoša? O ile wa dira eng? E be e le modumo wa eng?
•  Terowa seswantšho sa Nare yo Monyenyane le Mmane Kubu.
• Terowa nkgokolwana ya mantšu ya go tšwa molomong wa Nare yo Monyenyane le ya go tšwa molomong wa Mmane Kubu.
• Kopa mantšu a kanegelong a moanegwa yo mongwe le yo mongwe gomme o a ngwale ka gare ga dinkgokwalana tšeo.
•  Nagana ka pula. Ngwala sereto sa go bolela ka modumo wa pula, monkgo wa pula le kamoo o ikwago ka gona ge pula e go nela mo letlalong.