nyatsi Lencane yavuka ngeluhlangotsi lolungasikahle etjanini ekuseni ngalelo langa. Beyingakalali kahle ngalobo busuku. Busuku bonkhe, beyive umsindvo lowetfusa kakhulu ehlatsini. Ekucaleni, lomsindvo wawuvakala ukhashane, kodvwa wawuloku usondzela kancane kancane. Wawuvakala njengemsindvo wesisu lesidvumako saMkhulu loyiNdlovu nakalambile! Lamuhla ekuseni kubonakala shengatsi kute kuleti letinye tinyatsi lewuvile lomsindvo. Futsi ngisho noma Inyatsi Lencane bekungiyo lencane emhlanjini wetinyatsi, beyingeke ibute leti letinye tinyatsi letincane ngalomsindvo! Kutawutsiwani nangabe ticabanga kutsi iligwala futsi tihlekise ngayo? Ekuseni, Inyatsi Lencane beyitibuta kutsi lomsindvo wekudvuma wani. Mkhulu loyiNdlovu bekatihlafunela ngekuthula emacembe esihlahla semopane ngesikhatsi Inyatsi Lencane yendlula eceleni kwakhe iya emgodzini wemanti. “Mkhulu Ndlovu, bekusisu sakho lesi besenta umsindvo wekudvuma lomkhulu itolo ebusuku lebengiwuva lonkhe lelihlatsi?” kubuta Inyatsi Lencane.

“Cha, Nyatsi Lencane. Bekungasimi. Sisu sami sicale kwenta umsindvo wekudvuma nasekuphume lilanga lamuhla ekuseni,” kuphendvula Mkhulu loyiNdlovu. Ngemuva kwaloko wahamba waya ngasetihlahleni letindze. Emgodzini wemanti, Inyatsi Lencane yakhandza Anti loyiMvubu atsamele sicelu. “Anti Mvubu, uwuvile yini mhlawumbe umsindvo wekudvuma itolo ebusuku” kubuta Inyatsi Lencane. “Cha, Nyatsi Lencane. Tindlebe tami betisekhatsi emantini. Angikeva lutfo,” kuphendvula Anti loyiMvubu. Ngemuva kwaloko yatamula kakhulu yacimeta yase iyalala. Intsambama yonkhe Inyatsi Lencane beyitibuta kutsi lomsindvo wekudvuma bewuyini. Beyibuta bonkhe lehlangana nabo kutsi bawuvile yini lomsindvo, kodvwa kute lobekawuvile.

“Mhlawumbe nje bewubhudza, Nyatsi Lencane,” kuphendvula Make loyiNyatsi nakabutwa. Futsi Make bekangati ngoba Inyatsi Lencane beyilele eceleni kwakhe. Naseyisitsele imisebe yelilanga yekugcina, besekusikhatsi sekutsi Inyatsi Lencane nato tonkhe leti letinye tinyatsi tihlale phansi etjanini lobutsambile ebusuku. Inyatsi Lencane beyisandza kulala ngesikhatsi iphaphama yetfukile. Akungabateki kutsi yeva lomsindvo wekudvuma! Ekucaleni lokudvuma kwakuvakala shengatsi kukhashane, kodvwa kwakusondzela kancane kancane. Futsi kwaba kukhulu nakakhulu! Inhlitiyo yeNyatsi Lencane yashaya shengatsi sigubhu. Yabuka eceleni kwayo kuze ibone kutsi leletinye timvubu tiwuvile yini lomsindvo, kodvwa tonkhe tatilele saka. Ngisho naMake loyiNyatsi bekanganyakati. Inyatsi Lencane yativa yesaba. Lomsindvo wekudvuma wawuloku uvakala eceleni kwayo. Ngemuva kwaloko … FATSA! Kwaba nemanti lehlela emphumulweni yeNyatsi Lencane! Fatsa, fatsa, fatsa! Ematfonsi lamanyenti abonakala.

Inyatsi Lencane yabuka etulu. Ematfonsi lamakhulu emanti ehla ngebunyenti esuka esibhakabhakeni. Inyantsi Lencane yatihleka kakhulu ... kuliciniso ... kufanele kube lena yimvula. Kwakuyimvula yekucala kuyibona! Futsi lomsindvo wekudvuma lebeyiwuva kwakungumsindvo wekudvuma kwelitulu! Bekute lobekufanele ikwesabe. Ngenhlitiyo lenekuthula, Inyatsi Lencane yasondzela yanamatsela emtimbeni waMake loyiNyatsi. Yalalela umsindvo wemvula lebeyehlela emacembeni nasetjanini sikhatsi lesidze, ngemuva kwaloko yatunywa butfongo yalala ngaphandle kwekunaka lokwentekako emhlabeni. 

Yenta indzaba ibe nemdlandla! 

•   Uyasikhumbula yini sikhatsi lapho weva khona umsindvo lowetfusako? Wenta njani? Wawubangelwa yini lomsindvo? 
• Dvweba sitfombe seNyatsi Lencane na-Anti loyiMvubu. Dvweba intfo lasabhaluni lapho kutawufakwa khona lokushiwo yiNyatsi Lencane nalokunye lapho kutawufakwa khona lokushiwo ngu-Anti loyiMvubu.
• Kopa emavi kulendzaba umlingiswa ngamunye lawashoko uwafake kuletintfo letisabhaluni lotidvwebile. 
• Cabanga ngemvula. Bhala inkhondlo lekhuluma ngekutsi uvakala njani umsindvo wemvula, liphunga layo nendlela levakala ngayo esikhunjeni.