Liphela lelincane lelinsundvu lelingenangcondvo lake lahlala endlini yinye nemndeni lotsite nelikati lawo. Leliphela lelincane lelinsundvu lelingenangcondvo, njengemndeni walo wonkhe wemaphela, lalitsandza kudla. Emaphela akudzingeki adle onkhe malanga, kodvwa kulendlu tincentwana nekudla lokusele lokumnandzi bekubekelwa eceleni kuze kudliwe likati – leliphela belingeke litiyekele letincentwana nalokudla! Timphondvwana talo tatiloku tinyakata njengoba tativa liphunga lelimnandzi leliphuma ekhishini lapho likati nalo lidla khona. “Ungayi ekhishini onkhe malanga ebusuku. Batakubona bakubulale!” kwecwayisa umndeni waleliphela lelincane lelinsundvu lelingenangcondvo. Kodvwa laliphila imphilo lemnandzi kakhulu futsi alizange litilalele letecwayiso tawo. Lalijabulela kudla lokunyenti lokumnandzi lebelikutfola esitjeni sakati. Lelikati belivamise kushiya kudla lelitakudla ekhatsi nebusuku njalo ebusuku, kodvwa ngalokumangalisako, belitsi nalifika esitjeni salo, lisikhandze singenalutfo. “Kuyamangalisa kakhulu-ke loku,” kucabanga lelikati. “Kungaba ligundvwane kuphela lelidla kudla kwami kwasebusuku onkhe lamalanga.” Ngako lafuna yonkhe lendlu lifuna leligundvwane.
Njengoba likati lifuna leligundvwane lelebako njalo ebusuku, leliphela lelincane lelinsundvu lelingenangcondvo lalichachatela lihleka. “Lelikati licabanga kutsi lihlakaniphile,” lagigitseka njengoba lilindzele likati kutsi liyekele kufuna. Ngalobunye busuku, leliphela lelincane lelinsundvu lelingenangcondvo lacaphela kutsi lelikati seliphindze lashiya kudla kwalo nelubisi kuze likudle ekhatsi nebusuku, futsi sisu salo sacala kukhala. Timphondvwana talo tatiloku tinyakata tiya ngalapha nangalapha, njengoba belilindzele kutsi likati liyolala. Layibuka inyanga ihamba kancane indlula efasitelweni. “Phangisa, uhambe uyolala! Ngifile yindlala,” kukhonona leliphela wadzimate lokati ekugcineni walala. Ngaleso sikhatsi, lokati weva buhlungu kakhulu ngoba bekehluleka kutfola leligundvwane lelisigebengu. Ecinisweni, bekehluleka nekulihogela kutsi likuphi. “Ngitawenta njani lomndeni nawati ngaleligundvwane? Utawucabanga kutsi sengikhule kakhulu kangangekutsi angisakwati kucosha ligundvwane noma kulihogela! Ungase ucabange kutfola likati lelisha naleliselincane,” licabanga liva buhlungu. Ebusuku ngalelinye lilanga, leliphela lelincane lelinsundvu lelingenangcondvo lanyonyoba langena ekhishini futsi. “Emakati akakahlakaniphi kakhulu,” licabanga njengoba lidla kudla lokusele lokusesitjeni selikati. Kodvwa kungakatelelwa lilambu lasekhishini lakhanya, kwalandzela kumemeta lokuhlabako lokudze lokunekwesaba!
Lokumemeta kwakukukhulu futsi kuhlaba kangangekutsi kwalidida leliphela lelincane lelinsundvu lelingenangcondvo laze langati kutsi lishone kuphi. Lona bekamemeta bekungulomake lohlala kulendlu. Wachubeka amemeta futsi agijima lonkhe likhishi ngelunyawo lunye, agcuma, sekutsi nje ngaso sonkhe sikhatsi bekaligeja leliphela lelincane lelinsundvu lelingenangcondvo njengoba beligijima. Wonkhe lomsindvo wekwesaba wenta likati nalo leta ligijima litowujoyina loku lokucoshwako. Loku kwaniketa lomake litfuba lekutsi atsatse kwekufutsa lokukhulu lokubovu. Leliphela lelincane lelinsundvu lelingenangcondvo labalekela lelikati, lijabulile kutsi lomake bekubonakala shengatsi sowuphonse lithawula, kodvwa belingayicapheli ingoti lebelikuyo. Lomake walifutsa leliphela, lelikati latsimula, futsi leliphela lacala kutiva lisangana futsi liba nesiyeti.
“Awu, lomsindvo utawucheketa sikobho sami,” kucabanga leliphela lelincane lelinsundvu lelingenangcondvo, “futsi angiboni kahle nangabe inhloko yami ijikajika kakhulu kangaka. Kungani, vele kungani ngebe lokudla kwalelikati? Kungani vele ngingakawulaleli umndeni wami?” lacuma ngaphambi kwekutsi liculeke. Lomake wadvonsa umshanelo futsi washanyela leliphela lelincane lelinsundvu lelingenangcondvo njengoba likati libukile. “Wena phela lelincane lelinsundvu lelingenangcondvo, uke uphindze ubuye lapha! Ngitawube ngikumele futsi ngikubukile,” kusho lelikati njengoba lomake ajikijela leliphela ngephandle ebumnyameni alikhipha ngemnyango wangemuva. Futsi kungako, kuze kube ngulamuhla, liphela lelincane lelinsundvu lelingenangcondvo lihlala ngaphandle, khashane nemakati nekwekufutsa kanye nakubomake labamemeta ngelivi lelihlabako. Kodvwa ngaletinye tikhatsi liphunga lelimnandzi liba linyenti kulo, futsi leliphela lelincane lelinsundvu lelingenangcondvo litawugijima liye endlini kuze libe nesidlo lesincane ekhatsi nebusuku.
Yenta indzaba ibe nemdlandla!
- Ungativa njani nawungabona liphela endlini yakho? Dvweba sitfombe sakho nawubona liphela.
- Asesitsi leliphela lifuna kucolisa kulelikati nggekweba kudla kwalo. Bhala incwadzi leliphela leliyitfumela kulelikati
- Tente shengatsi ungumake walendlu. Khombisa kutsi wagcuma kanjani ngesikhatsi abona leliphela.
- Sebentisa lubumba noma inhlama yekudlala kuze ubumbe likati neliphela
