Palesa na Kerry vho vha khonani khulwanesa u bva musi vhe na miṅwaha miraru. Vho vha vhe vhahura nahone vhomme avho na vhone vho vha vhe dzikhonani. Vha siana nga ṅwedzi nahone vho aluswa sa vhana vha mme. Vho vha vha tshi ita zwithu zwoṱhe vhe vhavhili. Vho dzhena tshikolo tshithihi nahone tshifhinga tshoṱhe vho vha vha tshi fheleledza vhe kilasini nthihi! Ḽiṅwe ḓuvha musi vhenevho vhasidzana vho no aluwa, ha itea tshiṅwe tshithu tshe tsha vha ṱungufhadza vhukuma. Kerry o ya hayani ha Palesa a tshi khou tsengisa miṱodzi. “Mulandu ndi mini?” hu vhudzisa Palesa, a tshi khou vhilaedziswa vhukuma nga khonani yawe.

“Khotsi anga vho wana mushumo kha iṅwe ḓorobo nahone muṱa wahashu u tea u pfuluwa,” ndi Kerry a no ralo a tshi khou tsengisa miṱodzi. Vhenevho vhasidzana vha lila zwihulu. “Mmawe, Kerry a nga dzula na riṋe, ’thi?” ndi Palesa a tshi khou luvheledza mme awe. “Mmawe, Palesa a nga ṱuwa nga riṋe ’thi?” Kerry a humbela mme awe. Fhedzi zwi ṱungufhadzaho ndi uri zwenezwi zwo vha zwi sa konadzei ngauri vhenevho vhasidzana vho vha vha tshi tea u dzula na miṱa yavho. Nga ḓuvha ḽa nga phanḓa ha musi vha muṱa wa ha Kerry vha sa athu pfuluwa.

Palesa o humbula nga ha u ṋea khonani yawe tshifhiwa tsho khetheaho. O vha o humbula u mu ṋea lukunda lu re na zwikhavhisi lwe a ṋewa nga makhulu wawe kale. Mufumakadzi we a rengisela makhulu wawe lwonolwo lukunda o amba uri o ita vhuvhili fhedzi. Luṅwe lukunda lwo vha lu na tshiga tsha ḓuvha, ngeno luṅwe lu na tshiga tsha ṅwedzi. Makhulu wa Palesa vho vha vho khethela Palesa tshiga tsha ḓuvha. “Ni tshedza tsha vhutshilo hashu,” vha ralo musi vha tshi khou ṋea Palesa lukunda. Musi makhulu wa Palesa vha tshi lovha, Palesa o vha a tshi pfa lufuno lwa makhulu wawe musi a tshi ambara lwonolwo lukunda. O vha a tshi lu funa nga maanḓa.

“Ndi khou ṱoḓa u ṋea Kerry holu lukunda,” Palesa a ambela mbiluni. “Lu ḓo mu humbudza uri ri ḓo dzula ri khonani khulwane.” Kerry a pfulutshela kha tshiṅwe tshikolo, fhedzi o ṱuvha vhukuma khonani yawe. Vhenevho vhasidzana vho vha vha tshi ṅwalelana marifhi musi vha tshi wana tshibuli. Ḽiṅwe ḓuvha Palesa a rumelwa tshiputo nga poso. Tsho vha tshi tshi bva kha Kerry. “Ndi ḓivhudzisa uri hu nga vha hu na mini ngomu,” Palesa a ralo musi mme awe vha tshi mu ṋea tshenetsho tshiputo. “Tshi putululeni!” Mma vha ṅweṅwela. Zwe zwa mangadza Palesa ndi uri o wana lukunda lune lwa fana na lwe a lu dzhenisa kha tshiputo tshe a ṋea Kerry. “Ndi ngani o humisa lukunda lwe nda mu ṋea?” hu vhudzisa Palesa, a tshi khou vhilaela nahone o ṱungufhala zwiṱuku.

Fhedzi musi Palesa a tshi fhenḓa-fhenḓa lwonolwo lukunda, a vhona uri lu na tshiga tsha ṅwedzi. “Holu ndi holuya lukunda lwe Gugu vha mmbudza nga halwo!” Palesa a ralo a tshi khou ṅwethuwa zwihulu. Ndi izwiha a tshi vhona mulaedza u bvaho kha Kerry. Kerry o vha o ṅwala uri: Holu lukunda ndo lu wana nḓuni ye ra pfulutshela khayo. Ndo lu humisela ha muṋe walwo, fhedzi a mmbudza uri ndi tshifhiwa tshe a nṋea tshone. Ndi khou ni ṋea lwone u ni humbudza uri ri ḓo dzula ri madele mapfani.

“Zwo sokou itea nga vhuṱolo,” Palesa a ralo, musi a tshi khou ambara lwonolwo lukunda. Palesa o vha a tshi zwi ḓivha uri tsho vha tshi tshiga tsha uri vha ḓo dzula vhe dzikhonani hu sa londwi uri vha dzula vhukule vhungafhani. Vho vha vha tshi nga ḓuvha na ṅwedzi, vhuvhili havho vha vhonetshela nga nḓila dzi sa fani.

Itani uri tshiṱori tshi nyanyule!

•  Ni na khonani khulwanesa? Ndi mini zwine na zwi funa nga ha khonani yaṋu khulwanesa?
•  Olani tshifanyiso tshaṋu na tsha khonani yaṋu khulwanesa ni tshi khou ita zwithu zwine na zwi funesa.
• Ni nga dovha na ṅwala na u khavhisa ḽeḓere u sumbedza nḓila ine na dzhiela ngayo nṱha khonani yaṋu khulwanesa. Ni tshi ṅwala vhurifhi ni nga thoma nga uri, “Kha Jabu, ndi a livhuwa uri ni khonani yanga. Ndi a ni funa ngauri ...”