Palesa na Kerry a va ri vanghana lavakulu ku sukela loko va ri na malembe manharhu. A va ri vaakelani naswona ni vamana wa vona a va ri vanghana. A va siyana hi n’hweti naswona va kurisiwe onge i vamakwavo. Swilo hinkwaswo a va swi endla swin’we. A va nghena xikolo xin’we naswona minkarhi hinkwayo a va tikuma va ri etlilasini yin’we! Kutani siku rin’wana loko se va kulakurile, ku humelele swin’wana leswi va tiseleke gome lerikulu. Kerry u fike eka va Palesa a ri eku rileni. “Swi lo yini?” ku vutisa Palesa, a karhatekile swinene hi munghana wa yena. “Tatana u kume ntirho edorobeni rin’wana, kutani hinkwerhu ekaya hi fanele hi rhurha,” ku vula Kerry a ri karhi a rila. Swinhwanyetana leswimbirhi swi rile hi xiviti. “Mama, ndzi kombela leswaku Kerry a tshama na hina.” Palesa a xavelela mana wakwe. “Mama, ndzi kombela leswaku Palesa a famba na hina.” Kerry a xavelela mana wakwe.

Khombo ra kona a swi nga ta koteka hikuva havambirhi a va fanele va tshama na mindyangu ya ka vona. Loko ku sale siku rin’we leswaku ndyangu wa ka va Kerry wu rhurha, Palesa u ehleketisise hi nyiko yo hlawuleka ya munghana wakwe. A ku ri sindza ra timhamba leri kokwa wakwe wa xisati a n’wi nyikeke rona khale. Wansati loyi a xaviseleke kokwa wakwe sindza ra kona u vule leswaku a a endle mambirhi ntsena ya muxaka lowu. Rin’wana a ri ri na mhamba ya dyambu, lerin’wana ri ri na mhamba ya n’weti. Kokwa wa Palesa u n’wi hlawulele lera dyambu.

“U rivoningo ra vutomi bya hina,” ku vula kokwana a ri karhi a nyika Palesa sindza. Loko kokwa wa Palesa a lova, Palesa a a twa rirhandzu ra kokwa wakwe minkarhi hinkwayo loko a ri vehela evokweni. A ri ri ra nkoka swinene eka yena. “Sindza leri ndzi lava ku ri nyika Kerry,” Palesa a vulavula a ri yexe hi rito ra le hansi. “Ri ta n’wi tsundzuxa leswaku hi ta tshama hi ri vanghana lavakulu.” Kerry u ye exikolweni lexintshwa, kambe a a n’wi kumbuka swinene munghana wakwe. Swinhwanyetana leswimbirhi a swi tshamela ku tsalelana mapapila loko swo tshuka swi kume xinkarhana. Siku rin’wana, Palesa u kume phasele hi poso.

A ri huma eka Kerry. “Hambi ku na yini endzeni,” ku vula Palesa loko mana wakwe a n’wi nyika rona. “Ri pfule!” ku vula Mama hi ku n’wayitela. Lexi nga hlamarisa Palesa, loko a pfula u kume sindza leri fanaka kahle ni leri a ri nyikeke Kerry. “Ha yini Kerry a ndzi vuyisele sindza leri?” ku vutisa Palesa a karhatekile emoyeni.

Kambe loko Palesa a ri nyangisisa, u kume leswaku rona a ri ri na n’weti. “Ku fanele ku ri sindza lerin’wana leri Kokwana a ndzi byeleke hi rona!” ku vula Palesa hi ku n’wayitela lokukulu. U kume ni xipapilana lexi humaka eka Kerry. Kerry a a tsale a ku: Ndzi kume sindza leri ekaya ra hina lerintshwa. Ndzi ringete ku ri tlherisela eka n’wini wa rona kambe u ndzi byele leswaku ndzi namba ndzi ri teka, i nyiko ya mina. Ndzi ku rhumela rona tanihi xitsundzuxo xa leswaku hi ta tshama hi ri vanghana lavakulu.

“Leswi i mihlolo,” ku vula Palesa a ri karhi a vehela sindza evokweni. Palesa a a swi tiva leswaku lexi i xikombiso xa leswaku vanghana lava vambirhi a va nge hambanisiwi hi nchumu, hambi va tshama ekule ni le kule. A va fana na dyambu na n’weti, leswi voningaka hi ndlela leyi nga faniki.

Endla ntsheketo wu nyanyula!  

• Xana u na yena munghana lonkulu? I yini leswi u swi rhandzaka hi yena? 
• Dirowa xifaniso xa wena na munghana wa wena lonkulu mi ri karhi mi endla xintirhwana lexi u xi rhandzaka ngopfu
• Nakambe u nga tsalela munghana wa wena papila u tlhela u ri khavisa u n’wi byela ndlela leyi u n’wi tlangelaka ha yona.
• U nga sungula papila ra wena hi ku, “Eka Jabu, ndza nkhensa ku va na munghana wo fana na wena. Lexi endlaka ndzi ku tlangela ngopfu hileswi …”