Palesa le Kerry e bile bagwera ba bagolo go tloga ba sa na le mengwaga e meraro. Ga gabo bona e be e le kgauswi le kgauswi, e bile bommago bona le bona e be e le bagwera. Ba be ba šiana ka kgwedi gomme ba godišitšwe bjalo ka bana ba motho. Ba be ba dira dilo ka moka mmogo. Ba be ba tsena sekolong se setee gomme ka mehla ba tsena ka klaseng e tee! Ke moka ka letšatši le lengwe, ge banenyana ba ba gotše nyana, go ile gwa direga selo seo se ilego sa ba kweša bohloko kudu. Kerry o ile a fihla gabo Palesa a lla. “Molato ke’ng?” gwa botšiša Palesa, a tshwenyegile kudu ka mogwera wa gagwe.
“Tate o hweditše mošomo toropong e nngwe, gomme lapa la gešo le a huduga,” gwa realo Kerry a dutše a lla. Banenyana ba ba babedi ba ile ba lla mmogo. “Mama, naa Kerry a ka dula le rena?” gwa realo Palesa a kgopela mmagwe. “Mama, naa Palesa a ka sepela le rena?” gwa realo Kerry a kgopela mmagwe. Eupša ka maswabi, seo se be se sa kgonege ka gobane yo mongwe le yo mongwe wa bona o be a swanetše go dula le lapa la gabo. Letšatši la pele ga ge lapa labo Kerry le ka sepela, Palesa o ile a nagana ka mpho ya go kgethega yeo a bego a nyaka go e nea mogwera wa gagwe Kerry. E be e le pheta ya mahlatse yeo makgolo wa gagwe a mo neilego yona kgalekgale. Mosadi yo a rekišeditšego makgolo wa Palesa pheta yeo o mmoditše gore o be a dirile dipheta tše pedi feela tša mohuta woo. Pheta e nngwe e be e na le letšatši, gomme e nngwe e na le ngwedi. Makgolo wa Palesa o be a kgethetše Palesa pheta ya letšatši.
Ge a be a nea Palesa pheta yeo o ile a re go yena: “O seetša sa maphelo a rena.” Ge makgolo wa Palesa a hlokofetše, ka mehla Palesa o be a ekwa lerato la gagwe ge a apara pheta yeo. Palesa o be a e rata kudukudu. “Ke nyaka go nea Kerry pheta ye,” gwa realo Palesa a sebaseba a nnoši. “E tla mo gopotša gore nna le yena re tla dula re le bagwera ba bagolo.” Kerry o ile a ya sekolong se seswa, eupša o be a hlologela mogwera wa gagwe kudu. Banenyana ba ba babedi ba be ba dula ba ngwalelana mangwalo. Ka letšatši le lengwe, Palesa o ile a hwetša sephuthelwana ka posong. Se be se etšwa go Kerry. “Ke ipotšiša gore go na le eng ka gare,” gwa realo Palesa ge mmagwe a mo nea sephuthelwana seo. “Se bule!” gwa realo Mmagwe a myemyela. Palesa o ile a makala kudu ge a hwetša gore ke pheta ya go swana le yeo a e neilego Kerry. “Gore’ng Kerry a bušitše pheta ye ke mo neilego yona?” gwa botšiša Palesa, a tshwenyegile e bile a nyamile nyana.
Eupša ge Palesa a lebelela pheta yeo gabotse, o ile a bona gore ye e na le ngwedi, e sego letšatši. “Ye ke pheta yeo Makgolo a mpoditšego ka yona!” gwa realo Palesa a myemyela kudu. Ke moka o ile a hwetša le lengwalwana la go tšwa go Kerry. Kerry o be a ngwadile gore: Ke hweditše pheta ye legaeng la rena le leswa. Ke lekile go e bušetša go mong wa yona, eupša o itše o mpha yona e le mpho. Bjale ke go romela yona go go gopotša gore nna le wena re tla dula re le bagwera ba bagolo. “Ka nnete wo ke mohlolo,” gwa realo Palesa, ge a dutše a apara pheta yeo.
Palesa o ile a tseba gore le ke leswao la gore segwera sa bona se ka se tsoge se fedile, go sa šetšwe gore ba dula kgole le kgole. Ba be ba swana le letšatši le ngwedi, tšeo bobedi bja tšona di fanago ka seetša sa moswananoši.
Dira gore kanegelo e be le bophelo!
- Naa o na le mogwera wa mmamoratwa? Ke’ng se o se ratago kudu ka mogwera yoo wa gago?
- Terowa seswantšho sa gago le mogwera yoo le dira dilo tše le di ratago.
- Gape o ka ngwala le go kgabiša lengwalo la go hlalosa kamoo o lebogago mogwera wa gago. O ka thoma lengwalo la gago ka gore, “Dumela Jabu, ke leboga gore o mogwera wa ka. Ke a go leboga ka gobane …”
