Nako nngwe bogologolo, go ne go na le mma pidipidi yo o neng a na le ditsuanyane tse dinnye di le thataro, tse di serolwana. Ba ne ba nna mo ntlong e nnye mo polasing, mme ditsuanyane di ne tsa tsalwa ka nako e e omileng, ya selemo se se mogote. Go ne go se na pula e di ka tshamekelang mo go yone e bile go se na metsi a di ka phashakanyang mo go one. “Ke eletsa e kete pula e ka bo e na,” Mma Pidipidi a raya ditsuanyane tsa gagwe jalo. “Go monate tota go tshamekela mo puleng. Ke a itse gore lo tla rata pula. Dipidipidi tsotlhe di rata pula!”

Mme, fa selemo se fetoga go nna letlhabula, kgabagare pula e ne ya simolola go na! Mma Pidipidi o ne a tsoga fa a utlwa pula e sarasara mo borulelong. O ne a bitsa ditsuanyane tsa gagwe, “Tlang lo tle go bona pula!” O ne a itumetse thata jaana mme a phutha ditsuanyane tsa gagwe tsotlhe ka bonako. Go tswa foo tsotlhe di ne tsa latela Mma Pidipidi mo puleng.

Mme tsuanyane e nnye mo go tsone tsotlhe e ne ya boela mo teng gape ka bonako. “Mathata ke eng?” Mma Pidipidi a botsa jalo. “Tswela kwa ntle mme o utlwe pula e e monate.”

“Nnyaa, ke a leboga,” tsuanyane e nnye ya rialo. “Ga ke rate pula. Ga ke rate go koloba, mme pula e dira gore mafofa a me a a serolwana a ngaparele mmele wa me.”

Mama Pidipidi o ne a sa dumele se a se utlwang. O ne a phaphatha diphuka tsa gagwe mme a re, “A o kile wa utlwa go twe pidipidi ga e rate pula? Ke tla tshwanelwa ke go dira leano.”

Moso o o latelang, Mma Pidipidi o ne a ya go bua le Mma Podi MaMbuzi, yo o neng a na le lebenkele le le rekisang sengwe le sengwe mo polasing. “MaMbuzi, tsuanyane ya me e nnye go di gaisa tsotlhe ga e batle go tswela kwa ntle fa pula e na. A re ga a rate go koloba. A o kile wa utlwa go twe pidipidi ga e rate pula? Re tshwanetse go dira leano!” Mma Pidipidi a rialo.

MaMbuzi a tshega. “Ke ka gonne e sa ntse e le nnye thata mme ga e ise e ko e bone pula,” a rialo. Go tswa foo MaMbuzi a batlabatla mo dikhabotong tsa gagwe mme a bona jase e nnye e pududu ya pula. “Tsaya,” a raya Mma Pidipidi jalo. “Mo neye jase e nnye eno e pududu ya pula gore a e apare fa pula e na gape.” Mma Pidipidi o ne a leboga MaMbuzi mme a ya gae ka jase ya pula.

Malatsi a le mmalwa moragonyana, pula e ne ya na gape. Mma Pidipidi o ne a naya tsuanyane ya gagwe e nnye jase ya pula gore a e apare. “Jaanong, a re tswele kwa ntle re ye go itumelela pula,” a rialo.

Ditsuanyane tsotlhe di ne tsa latela Mma Pidipidi ka boitumelo go ya kwa ntle mo puleng. Mme morago ga nakwana, Mma Pidipidi o ne a lemoga gore tsuanyane ya gagwe e nnye  ga e tlhole e le mmogo le bone. O ne a batla gongwe le gongwe mme kgabagare a mo fitlhela a le nosi mo teng ga ntlo. “Ke eng fa o dutse fano o le nosi? O na le jase ya pula jaanong, ka jalo, tswela kwa ntle mme o itumelele pula,” Mma Pidipidi a rialo.

“Nnyaa, ke a leboga,” pidipidi e nnye go gaisa ya rialo. “Ga ke rate pula. Seretse se dira gore dinao tsa me di ngaparele.”

Mma Pidipidi o ne a tlhakane tlhogo tota. “Dipidipidi tsotlhe di rata pula,” a rialo. “Ga di tshwenyege fa mafofa a tsone a koloba le fa dinao tsa tsone di tlala seretse! Ke tla tshwanelwa ke go dira leano!”

Moso o o latelang, Mma Pidipidi o ne a boela gape kwa go MaMbuzi go ya go kopa thuso. “MaMbuzi, tsuanyane ya me e nnye ga e rate pula ka gonne seretse se dira gore dinao tsa yone di ngaparele. Ke tshwanetse go dira eng? Re tshwanetse go dira leano.”

MaMbuzi o ne a tshega gape. “Ke ka gonne e sa ntse e le nnye mme dinao tsa yone di dinnye thata,” a rialo. Go tswa foo MaMbuzi a batlabatla mo dishelofong tsa gagwe mme a bona dibutshe tse dinnye tse ditala tsa pula. “Tsaya,” a raya Mma Pidipidi jalo. “Mo neye dibutshe tse dinnye tseno tse ditala tsa pula gore a di rwale fa pula e na gape.” Mma Pidipidi o ne a leboga MaMbuzi mme a ya gae ka dibutshe tseo.

Fa pula e na gape, Mma Pidipidi o ne a naya tsuanyane ya gagwe e nnye jase ya pula le dibutshe tsa pula gore e di rwale. “Jaanong, mma re ye kwa ntle mme re itumelele pula,” a rialo.

Tsuanyane e nnye e ne e itumetse thata jaanong. Mafofa a yone a ne a omile mme dinao tsa yone di ne di se na seretse. Mma Pidipidi o ne a nyenya mme a ikutlwa a wela makgwafo fa a ntse a lebeletse ditsuanyane tsa gagwe tsotlhe di tshameka mo puleng mmogo.

Fa pula e kgaotsa mme letsatsi le tswa, go ne ga tlhaga motshe wa godimo o mogolo mo loaping. “Bona, Mama,” ga rialo tsuanyane e nnye go gaisa e supa motshe wa godimo. “Selo sele se se mebalabala sele ke eng?”

Mma Pidipidi le ditsuanyane tse dingwe ba ne ba lebelela kwa loaping. Ditsuanyane tsotlhe di ne di gakgametse go bona lente e ntle ya mebalabala e ba neng ba e bona koo.

“Ke motshe wa godimo,” Mma Pidipidi a rialo a nyenya. “E tswa fa pula e kgaotsa, mme letsatsi le tswa. Fa lo lebelela ka kelotlhoko, lo tla bona gore e na le mebala e le supa e e farologaneng.”

“Ehe, ruri ke rata motshe wa godimo. O na le mebala e e tshwanang le e e mo jaseng ya me ya pula, mo dibutsheng tsa me tsa pula le mo mafofeng a me,” tsuanyane ya gagwe e nnye ya rialo ka boitumelo. Ditsuanyane tse dingwe tse tlhano di ne tsa dumalana le ene ka go phaphatha diphuka tsa tsone.

Fa letsatsi le phirima mme motshe wa godimo o nyelela, Mma Pidipidi le ditsuanyane tsa gagwe ba ne ba ya gae.

Go tloga ka letsatsi leo, tsuanyane e nnye e ne e fela pelo go bona pula e na gape gore e bone motshe wa godimo o mongwe. Tota e bile, e ne e itumetse thata jaana go bona motshe wa godimo, mo e leng gore e ne ya lebala gotlhelele go apara jase ya yone ya pula le go rwala dibutshe tsa yone tsa pula nako e e latelang fa pula e ne e na.

Fa motshe wa godimo o tlhaga, o ne a raya Mma Pidipidi a re, “Ga ke tlhole ke tshwenyega fa mafofa a me a koloba le fa dinao tsa me di tlala seretse ka gonne morago ga pula, letsatsi le tla tswa mme ke tla bona selo se sentle go gaisa mo lefatsheng – motshe wa godimo o mosha o o mebalabala. Ke rata pula, mme ke rata thatathata metshe ya godimo!”

Mma Pidipidi o ne a itumetse tota, e bile o ne a wela makgwafo le go feta. Jaanong ditsuanyane tsa gagwe tsotlhe di ne di rata pula, fela jaaka dipidipidi di tshwanetse!

Nna le matlhatlhaga a leinane!

Torowa setshwantsho se se bontshang se o ratang go se dira fa pula e na. Kafa tlase ga setshwantsho, kwala seele se se tlhalosang gore go direga eng.
Dira lenaane la dilo tse o ratang go di dira fa pula e na, le le lengwe la dilo tse o sa rateng go di dira.
A o itse pina nngwe e e buang ka pula kgotsa ka metshe ya godimo? Itlhamele pina ya gago kgotsa poko mme o bo o e opela kgotsa o e bokele ba lelapa la gaeno.