Kwathi ke kaloku ngantsomi, kwakukho umama olidada owayenamantshontsho amancinci amathandathu, atyheli. Babehlala kwindlu encinane efama, kodwa la mantshontsho ayezelwe ebudeni behlobo elalinembalela, nelalitshisa. Kwakungekho mvula neendawo ezimi amanzi anokudlala kuzo. “Akwaba ibinokuna imvula,” uMam’ uDada watsho kumantshontsho akhe. “Kumnandi nyhani ukudlala emvuleni. Ndiyazi ukuba niza kuyithanda imvula. Onke amadada ayayithanda imvula!”

Kuthe kusenjalo, njengoko ihlobo lalideda kungena ukwindla, ekugqibeleni yaqalisa ukuna imvula! UMam’ uDada wavuka akuva imvula ichaphaza kuphahla lwendlu. Wakhwaza amantshontsho akhe, “Yizani nizokubona imvula!” Wayenemincili nyhani ibe wakhawuleza waqokelela onke loo mantshontsho. Emva koko onke alandela uMam’ uDada esiya emvuleni.

Kodwa elona lincinci kula mantshontsho labuyela ngokukhawuleza endlini. “Yintoni ingxaki?” wabuza watsho uMam’ uDada. “Phuma uze kuva imvula emnandi.”

“Hayi, ndiyabulela,” latsho elona ntshontsho lincinci. “Andiyithandi mna imvula. Andikuthandi ukuba manzi, ibe imvula yenza iintsiba zam ezityheli zincamathele kum.”

UMam’ uDada wayengayikholelwa into ayivayo. Waphaphazelisa amaphiko waza wathi, “Wakha weva ngedada elingayithandiyo imvula? Kuza kufuneka ndizame icebo.”

Ngentsasa elandelayo, uMam’ uDada wahamba waya kuthetha noMam’ uBhokhwe, owayenevenkile apho efama eyayithengisa yonke into. “Mam’ uBhokhwe, untondo kumantshontsho am akafuni kuphuma xa imvula isina. Uthi akathandi kuba manzi yena. Wakha weva ngedada elingayithandiyo imvula? Kuza kufuneka sizame icebo!” watsho uMam’ uDada.

UMam’ uBhokhwe wahleka. “Kaloku usemncinci ibe uyaqala ukubona imvula,” watsho. Emva koko uMam’ uBhokhwe wakhengela ezikhabhathini zakhe waza wafumana isikhwehla semvula esincinci, esiblowu ngombala. “Thatha,” watsho ebhekisa kuMam’ uDada. “Khawumnike esi sikhwehla semvula sincinci siblowu ukuze asinxibe xa iphinde yana imvula.” UMam’ uDada wambulela uMam’ uBhokhwe waza wagoduka neso sikhwehla semvula.

Emva kweentsuku ezimbalwa, yaphinda yana imvula. UMam’ uDada wanika untondo wakhe isikhwehla semvula ukuze asinxibe. “Masiphume ke ngoku, siyodlala emvuleni,” watsho.

Onke amantshontsho edada alandela uMam’ uDada evuya esiya ngaphandle emvuleni. Kodwa emva kwethutyana, uMam’ uDada waphawula ukuba untondo wakhe wayengasekho kunye nabo. Wakhangela yonke indawo waza ekugqibeleni wamfumana ehleli yedwa endlwini. “Uhleleli ntoni apha wedwa? Unesikhwehla semvula kaloku ngoku, yiza ke siye kudlala emvuleni,” watsho uMam’ uDada.

“Hayi, enkosi,” watsho untondo. “Andiyithandi imvula. Udaka lwenza iinyawo zam zibe rhiphilili.”

UMam’ uDada wayedidekile. “Onke amadada ayayithanda imvula,” watsho. “Akuwakhathazi ukuba manzi kweentsiba zawo nokuba nodaka kweenyawo zawo! Kuza kufuneka ndenze icebo!”

Ngentsasa elandelayo, uMam’ uDada waya kuMam’ uBhokhwe eye kucela uncedo kuye. “Mam’ uBhokhwe, untondo wam uthi akayithandi imvula kuba udaka luzenza rhiphilili iinyawo zakhe. Ndenze ntoni? Kufuneka senze icebo.”

UMam’ uBhokhwe waphinda wahleka. “Kaloku usemncinci kwaye iinyawo zakhe zisencinci kakhulu,” watsho. Emva koko uMam’ uBhokhwe wakhangela ezishelfini zakhe waza wafumana iperi encinci yeebhutsi zemvula eziluhlaza ngombala. “Thatha,” watsho kuMam’ uDada. “Mnike ezi bhutsi zemvula zincinci ziluhlaza ukuze azinxibe xa imvula iphinde yana.” UMam’ uDada wambulela uMam’ uBhokhwe waza wagoduka nezo bhutsi.

Xa yaphinda yana imvula, uMam’ uDada wanika untondo wakhe isikhwehla semvula neebhutsi zemvula ukuze azinxibe. “Masiphume ke ngoku siye kudlala emvuleni,” watsho.

Untondo wayevuye kakhulu ngoku. Iintsiba zakhe zazomile neenyawo zakhe zingenadaka. UMam’ uDada wancuma kwatsho kweexibilili kuye njengoko wayebukele onke amantshontsho akhe edlala emvuleni.

Yathi yakunqamka imvula kwaza kwaphuma ilanga, kwabonakala umnyama omkhulu esibhakabhakeni. “Jonga, Mama,” watsho untondo esalatha loo mnyama. “Yintoni leya inemibalabala?”

UMam’ uDada namanye amantshontsho bajonga phezulu esibhakabhakeni. La mantshontsho edada ayemangaliswe onke bobo buhle, nemibalabala yaloo ribhoni ababeyijongile.

“Ngumnyama lo,” wancuma watsho uMam’ uDada. “Uphuma xa imvula iyeka ukuna, kuze kuphume ilanga. Ukuba ungawuqwalasela, uza kubona ukuba unemibala esixhenxe.”

“O, ndiwuthanda nyhani umnyama. Imibala yayo iyafana neyesikhwehla, iibhutsi zam zemvula neentsiba zam,” watsho untondo enemincili. Amanye amantshontsho edada nawo aphaphazelisa iimpiko zawo evumelana naye.

Ekutshoneni kwelanga nomnyama sele uthe shwaka, uMam’ uDada namantshontsho akhe bagoduka.

Emva kwaloo mini, untondo wamantshontsho edada wayesoloko ejonge enkalweni elinde imvula ukuze akwazi ukubona umnyama. Phofu, wayesiba nemincili kakhulu yokubona umnyama kangangokuba walibala shici ukunxiba isikhwehla neebhutsi zemvula zakhe xa iphinda isina.

Kwathi kwakuvela umnyama, wathi kuMam’ uDada, “Ayisandikhathazi into yokuba iintsiba zam zibe manzi neenyawo zam zibe nodaka xa imvula isina kuba emva kwemvula, ilanga liza kuphuma ndize ndibone eyona nto intle ehlabathini – umnyama omtsha omibalabala. Ndiyayithanda imvula, kodwa eyona nto ndiyithanda kakhulu yiminyama!”

Yayingekho enye into eyayinokonwabisa uMam’ uDada ize imenze azive kuthe xibilili. Ngoku onke amantshontsho akhe ayeyithanda imvula, kanye ngendlela afanele ayithande ngayo amadada!

[Get story active!] Yenza ibali linike umdla!

Zoba umfanekiso obonisa into othanda ukuyenza xa imvula isina. Ngezantsi kwaloo mfanekiso, bhala isivakalisi esichaza ukuba ungantoni.
Yenza uludwe lwezinto ozithandayo ngeentsuku zemvula, nolunye uludwe lwezinto ongazithandiyo.
Ikho ingoma oyaziyo ecula ngemvula okanye ngeminyama? Qamba eyakho ingoma okanye umbongo uze uwenze kwintsapho yakho.