Kgalekgaleng go be go na le mma wa letata yo a bego a na le bana ba tshela ba bakheri. Ba be ba dula ka ntlong e nyenyane polaseng, eupša matatana ao a be a belegwe ka selemo nakong ya ge go fiša kudu, go omile. Go be go se na pula ye ba ka ralokelago go yona le seretse se ba ka thankgelago go sona. “Ke duma eka pula e ka na,” gwa realo Mma Letata a botša matatana a gagwe. “Go bose kudu go ralokela puleng. Ke a tseba gore le tlo rata pula. Matata ka moka a rata pula!”

Ke moka ge selemo se dutše se eya se fetoga seruthwane, pula ya thoma go na! Mma Letata o ile a tsoga ge a ekwa marothi a pula ka godimo tlhakeng. O ile a bitša bana ba gagwe, a re, “Etlang le bone pula!” O be a thabile kudu, gomme a kgoboketša bana ba gagwe ka moka ka pejana. Ka moka ba latela Mmago bona go ya puleng.

Eupša ngwana yo monyenyane wa Letata o ile a gomela morago ka lebelo. “Molato ke’ng?” gwa botšiša Mma Letata. “Etla o kwe bobose bja pula.”

“Aowa, ke a leboga,” gwa realo ngwana yo monyenyane. “Ga ke rate pula. Ga ke rate go koloba, e bile pula e dira gore mafofa a ka a maserolane a nkgomarele.”

Mma Letata ga sa nka a kgolwa ditsebe tša gagwe. O ile a phuphusetša maphego a gagwe gomme a re, “O kile wa kwa kae ka letata la go se rate pula? Mo ke swanetše go loga leano.”

Mesong ya go latela, Mma Letata o ile a ya go Mma Pudi e lego MaMbuzi, yo a bego a na le lebenkele la go rekiša dilo ka moka polaseng yeo. “MaMbuzi, ngwanaka yo monyenyane ga a nyake go ralokela puleng. O re ga a rate go koloba. Naa o kile wa kwa ka letata la go se rate pula? Re swanetše go loga leano!” gwa realo Mma Letata.

MaMbuzi o ile a sega, ke moka a re, “Ke ka gobane e sa le ngwana gomme ga sa nka a bona pula.” Ke moka MaMbuzi o ile a putuka ka rakeng ya gagwe gomme a hwetša patšana e nyenyane e talalerata ya go thibela pula. “Swara,” a realo go Mma Letata. “Mo nee patšana ye e talalerata ya pula gore a e apare ge pula e ka na gape.” Mma Letata o ile a leboga MaMbuzi gomme a ya gae a swere patšana ya pula.

Matšatši a sego kae ka morago, pula e ile ya na gape. Mma Letata o ile a nea ngwana wa gagwe patšana ya pula gore a e apare. Ke moka a re, “Agaa, a re tšwele ka ntle re yo ipshina ka pula.”

Matatana ka moka a ile a šala Mmago wona morago go ya puleng. Eupša ka morago ga nakwana, Mma Letata o ile a lemoga gore ngwana yola wa gagwe yo monyenyane o timeletše. O ile a mo tsoma gohle gomme mafelelong a mo hwetša a ituletše a nnoši ka gare ga ntlo. “Gore’ng o ituletše mo o nnoši? Gabjale o na le patšana ya pula, etla o ipshine ka pula,” gwa realo Mma Letata.

“Aowa, ke a leboga,” gwa realo letata le lenyenyane. “Ga ke rate pula. Leraga le tanya maoto a ka.”

Mma Letata o ile a gakanega, gomme a re, “Matata ka moka a rata pula. Ga a tshwenyege ge mafofa a ona a koloba gomme maoto a ona a eba le maraga! Mo ke swanetše go loga leano!”

Mesong ya go latela, Mma Letata o ile a boela go MaMbuzi gore a mo thuše. “MaMbuzi, ngwanaka yo monyenyane o re ga a rate pula ka gobane leraga le tanya maoto a gagwe. Ke dire’ng? Re swanetše go loga leano.”

MaMbuzi o ile a sega gape, ke moka a re, “Ke ka gobane e sa le ngwana gomme maoto a gagwe ke a manyenyane kudu.” Ke moka MaMbuzi o ile a tsoma dišelofong tša gagwe gomme a hwetša diputsu tša pula tše dinyenyane tše talamorogo. “Swara,” a realo go Mma Letata. “Mo nee diputsu tše tše talamorogo gore a di apare ge pula e ka na gape.” Mma Letata o ile a leboga MaMbuzi gomme a ya gae le diputsu tšeo.

Ge pula e ena gape, Mma Letata o ile a nea ngwana wa gagwe yo monyenyane patšana ya pula le diputsu gore a di apare, ke moka a re, “Aga! A re tšwele ka ntle bjale re yo ipshina ka pula.”

Gabjale letata le lenyenyane le be le thabile kudu. Mafofa a lona a be a omile e bile maoto a lona a se na maraga. Mma Letata o ile a myemyela gomme a ikwa a imologile ge a dutše a lebeletše bana ba gagwe ka moka ba raloka mmogo puleng.

Ge pula e se no khula gomme letšatši le hlaba, go ile gwa bonala molalatladi o mogologolo leratadimeng. “Mma, bona,” gwa realo letata le lenyenyane le šupa molalatladi. “Selo sela sa mebalabala ke’ng?”

Mma Letata le bana ba gagwe ba bangwe ba ile ba lebelela leratadimeng. Bana ka moka ba ile ba makatšwa ke go bona sekantikodiko seo se sebotsebotse sa mebalabala.

“Ke molalatladi,” gwa realo Mma Letata a myemyela. “O tšwelela ge pula e se no khula gomme letšatši le hlaba. Ge le ka lebelela botse, le tla bona gore o na le mebala e šupa ya go se swane.””

“Tjoo, ke rata molalatladi kudu. O na le mebala ya go swana le ya patšana ya ka ya pula, diputsu le mafofa,” gwa realo ngwana yo monyenyane wa letata a thabile. Bana ba bangwe ba hlano ba ile ba dumelelana le yena ka go phuphusetša maphego a bona.

Ge letšatši le sobetše gomme molalatladi o nyameletše, Mma Letata le bana ba gagwe ba ile ba ya gae.

Ka morago ga letšatši leo, ngwana yo monyenyane wa letata o be a fela pelo ya gore pula e ne gape gore a tle a bone molalatladi o mongwe. Ge e le gabotse, ge pula e be e ena gape, o ile a thaba kudu go bona molalatladi moo a ilego a lebala le go apara diaparo tša gagwe tša pula le diputsu.

Ge molalatladi o se no tšwelela, o ile a re go Mma Letata, “Ge pula e ena, ga ke sa na taba gore mafofa a ka a a koloba le gore maoto a ka a ba le maraga ka gobane ge pula e se no khula, letšatši le tla hlaba gomme ka bona selo se sebotsebotse mo lefaseng – molalatladi o moswa wa mebalabala. Ke rata pula, eupša go dilo ka moka, ke rata melalatladi!”

Mma Letata o ile a thaba kudu le go ikwa a imologile. Gabjale bana ba gagwe ka moka ba be ba rata pula, go no swana le ge matata ka moka a swanetše go ba bjalo!

Dira gore kanegelo e be le bophelo!

Terowa seswantšo sa go bontšha seo o ratago go se dira ge pula e ena. Ka fase ga seswantšho, ngwala lefoko la go hlalosa seswantšho seo.
Ngwala dilo tše o di ratago ge pula e ena, le dilo tše o sa di ratego ge pula e ena.
Naa go na le koša ye o e tsebago ya go bolela ka pula goba melalatladi? Itirele koša goba sereto gomme o e opelele lapa la geno.