Kwesukasukela, bekunelidada lelingumake, lebelinemadada lamancane lamtfubi lasitfupha. Bebahlala endlini lencane epulazini, kodvwa lamadada lamancane abetalwe ngesikhatsi lesomile, ehlobo lelishisako. Beyingekho imvula labekangadlala kuyo futsi bekute nemachaphoti labekangatiphonsa kuwo. “Ngifisa shengatsi lingana,” Kusho Lidada Lelingumake litjela lamadada alo lamancane. “Kuyajabulisa kudlala emvuleni. Ngiyati kutsi nitayitsandza imvula. Onkhe emadada ayayitsandza imvula!”

Ngemuva kwaloko, njengoba lihlobo liba likwindla, ekugcineni lacala kuna! Lidada Lelingumake lavuka naliva imvula ishaya eluphahleni. Labita emadada alo lamancane, “Buyani nitowubona imvula!” Abejabule kakhulu futsi ngekushesha wahlanganisa onkhe emadada lamancane. Ngemuva kwaloko onkhe alandzela Lidada Lelingumake aphuma aya emvuleni.

Kodvwa lidada lelincane kunawo onkhe ngekushesha lajika labuyela endlini. “Yini inkinga?” Kubuta Lidada Lelingumake. “Phumela ngephandle uve imvula lemnandzi.”

“Cha, ngiyabonga,” kusho lidada lelincane kunawo onkhe. “Angiyitsandzi imvula. Angifuni kuba manti, futsi lemvula yenta kutsi tinsiba tami letimtfubi tinamatsele kimi.”

Lidada Lelingumaka alikukholwanga lelakuva. Lashaya timphiko talo latsi, “Likhona lidada lowake weva kutsi aliyitsandzi imvula? Kuyofanele ngente lisu lelitsite.”

Ngelilanga lelilandzelako ekuseni, Lidada Lelingumake lahamba layokhuluma naMake Loyimbuti MaMbuzi, lobekanesitolo kulelipulazi lebesitsengisa yonkhe intfo. “MaMbuzi, lidada lami lelincane kunawo onkhe alifuni kuphumela ngaphandle nangabe kuna imvula. Litsi alitsandzi kuba manti. Uke weva ngelidada lelingayitsandzi imvula? Kufanele sente lisu lelitsite!” kusho Lidada Lelingumake.

MaMbuzi wahleka watsi. “Kubangelwa kutsi liselincane futsi alikake seliyibone imvula.” Ngemuva kwaloko MaMbuzi wafuna ekhabetheni lakhe futsi watfola i-raincoat lencane leluhlata kwesibhakabhaka. “Mina tsatsa,” atjela Lidada Lelingumake. “Mnikete le-raincoat lencane leluhlata kwesibhakabhaka kuze ayigcoke nangabe ina imvula futsi.” Lidada Lelingumake labonga MaMbuzi lahamba laya ekhaya nale-raincoat.

Ngemuva kwemalanga lamabalwa, laphindze lana futsi. Lidada Lelingumake laniketa lidada lalo lelincane i-raincoat kuze liyigcoke. “Nyalo asihambe siye ngephandle futsi sijabulele imvula,” kusho Lidada Lelingumake.

Onkhe lamadada lamancane abejabulile alandzela Lidada Lelingumake aphumela ngaphandle emvuleni. Ngemuva kwesikhatsi, Lidada Lelingumaka lacaphela kutsi lidada lelincane kunawo onkhe laselingekho nabo. Lafuna yonkhe indzawo futsi ekugcineni lalitfola lilondvwana ngekhatsi endlini. “Kungani uhleti lapha wedvwana? Une-raincoat nyalo, phumela ngephandle ujabulele imvula,” kusho Lidada Lelingumake.

“Cha, ngiyabonga,” kusho lelidada lelincane kunawo onkhe. “Angiyitsandzi lemvula. Loludzaka lwenta tinyawo tami tinamatsele.”

Lidada Lelingumake lalidideke kakhulu. “Onkhe emadada ayayitsandza imvula,” kusho lomake. “Akanendzaba nangabe tinsiba tawo tiba manti futsi tinyawo tawo tiba neludzaka! Kutawudzingeka ngente lisu!”

Ngelilanga lelilandzelako ekuseni, Lidada Lelingumake labuyela emuva kuMaMbuzi kuze licele lusito. “MaMbuzi, lidada lami lelincane kunawo onkhe aliyitsandzi imvula ngoba ludzaka lwenta kutsi tinyawo talo tinamatsele. Kufanele ngente njani? Kutawudzingeka sente lisu.”

MaMbuzi wahleka futsi, wase utsi. “Loko kubangelwa kutsi liselincane futsi tinyawo talo tincane kakhulu.” Ngemuva kwaloko MaMbuzi wafuna emashelufini akhe futsi watfola emabhudze emvula lamancane laluhlata. “Mina tsata,” asho kuLelidada Lelingumake. “Mnikete lamabhudze emvula lamancane laluhlata kuze awagcoke nakuna imvula futsi.” Lidada Lelingumake labonga MaMbuzi futsi lahamba laya ekhaya nalamabhudze.

Naliphindze lina futsi, Lidada Lelingumake laniketa lidada lelincane kunawo onkhe i-raincoat nemabhudze emvula kuze liwagcoke. “Nyalo, asihambe siye ngephandle sijabulele imvula,” kusho Lidada Lelingumake.

Lelidada lelincane kunawo onkhe beselijabule kakhudlwana nyalo. Tinsiba talo betomile futsi tinyawo talo betite ludzaka. Lidada Lelingumake lamamatseka futsi lativa likhululeka kakhulu njengoba libukela onkhe emadada alo lamancane adlala emvuleni kanye kanye.

Naseyihhamukile imvula nelilanga seliphumile, kwavela umushi wenkosazana lomkhulu esibhakabhakeni. “Buka, Make,” kusho lidada lelincane kunawo onkhe likhomba lomushi wenkosazana. “Yini leyantfo lenemibalabala?”

Lidada Lelingumake nalamanye emadada lamancane babuka esibhakabhakeni. Lamadada lamancane abemangele ngalobuhle bemushi wenkosazane lomibalabala lawubona.

“Ngumushi wenkosazana loya,” kumamatseka Lidada Lelingumake. “Uvela nakuhhamuka imvula, ngemuva kwaloko kuphuma lilanga. Nawubukisisa, utawubona kutsi unemibala leyehlukahlukene lesikhombisa.””

“Maye ngiyawutsandza lomushi wenkosazana. Unemibala lefanako neye-raincoat yami, emabhudze netinsiba,” kusho lidada lakhe lelincane kunawo onkhe lijabulile. Lawa lamanye emadada lamancane lasihlanu ashaya timphiko tawo avuma.

Lilanga nalishona futsi umushi wenkosazana unyamalala, Lidada Lelingumake nemadada alo lamancane bahamba baya ekhaya.

Ngemuva kwalelo langa, lelidada lelincane kunawo onkhe beselikulindze ngalabovu kutsi kuphindze kune imvula kuze litowubona umushi wenkosazana futsi. Ecinisweni, lalijabule kakhulu ngekubona umushi wenkosazana, kangangekutsi lakhohlwa nya kugcoka i-raincoat yalo nemabhudze ngesikhatsi lesilandzelako nakuna imvula.

Nakuvela umushi wenkosazana, latsi kuLelidada Lelingumake, “Angisenadzaba nangabe tinsiba tami tiba manti futsi tinyawo tami tiba neludzaka nalina ngoba naselihhamukile, kutawuvela lilanga futsi ngitawubese ngibona intfo lenhle kakhulu emhlabeni – umushi wenkosazane lomusha lomibalabala. Ngiyayitsandza imvula, kodvwa lengikutsandza kakhulu ngumushi wenkosazana!”

Lidada Lelingumake belijabule kakhulu, futsi likhululekile kakhulu. Nyalo onkhe emadada alo lamancane besekayitsandza imvula, njengoba vele emadada kulindzeleke kutsi ayitsandze!

[Get story active!] Yenta indzaba ibe nemdlandla!

Dvweba sitfombe lesikhombisa loko lotsandza kukwenta nakuna imvula. Ngephansi kwalesitfombe, bhala umusho lochaza kutsi simayelana nani.
Bhala luhla lwaloko lokutsandzako nakuna imvula, nalolunye luhla lwaloko longakutsandzi.
Ikhona ingoma loyatiko lemayelana nemvula noma umushi wenkosazana? Yakha yakho ingoma noma inkhondlo futsi uyihayele umndeni wakho.