Kgalekgale ho ne ho na le mofumahatsana ya bitswang Matty. O ne a dula polasing e nyenyane, moo mobu wa teng o neng o le thata mme ho sehlwa ka thata. Empa Matty e ne e se sehwai feela tjee se tlwaelehileng. O ne a ikemiseditse a bile a sebetsa ka thata motjhesong wa letsatsi e le hore a leme meroho e lekaneng hore a lo e rekisa ka mmarakeng o neng o phethesela batho haufi le moo a dulang.

Ha dijalo tsa Matty di se hodile, mme di le ngata hoo a ka di arolelanang le ba bang, a di tshela ka basketeng ya hae mme a leba mmarakeng, sefahleho sa hae se kganya kgotso ke thabo. “Kajeno ke tlo rekisa meroho ena kaofela, mohlomong ke be ke iputse ka ntho e monate,” a rialo.

Nnete ke hore Matty o ne a emetswe ke ntho e monate eo a e ratang mmarakeng. Ntho eo e ne e le diapole, tse kgolo, tse dutlisang mathe, tse hlabosehang. O ne a sitwa ho iphapanyetsa monate wa tsona o neng o mo hohela. E ne e le tsona moputso wa mosebetsi ohle wa hae o boima.

Ha Matty a fihla tafoleng ya ditholwana, a kopana le mosadimoholo ya botswalle, eo marama a hae a neng a le mafubetswana jwalo ka diapole tse butswitsweng ha monate. Mahlo a hae a tlala thabo ha a ntse a shebile ha Matty a ananela diapole tsa mebala e sa tshwaneng.

Ha feralla mehopolo e mengata ka kelellong ya Matty ha a ntse a nahana hore na a reke diapole dife bakeng sa dintho tseo a tlo di baka. “Diapole tse kgubedu di monate bakeng sa ho baka kuku,” ha rialo Matty a buela hodimo ha a kgetha apole e kgubedu. “Mohlomong diapole tsena tse mmala o motala di tla loka bakeng sa phae, ebe ke nka le diapole tsena tse tswakileng mmala o mofubedu le o motala bakeng sa dimafene. Nka se siye diapole tse tshehla bakeng sa phae e futhumetseng e entsweng ka diapole, e nang le dintho tse monate ka hodimo.” Ha Matty a ntse a bua ka apole ya mofuta o itseng, o ne a e kenya ka basketeng ya hae.

Mosadimoholo a tshehela ka marameng. Yaba o nka apole e tshehla mme o e fa Matty. “Mang kapa mang ya ratang diapole jwalo ka wena tjena o tshwanelwa ke ntho e kgethehileng e monate. Nka apole e kgethehileng ke ena. E tla dula e o tlisetsa thabo,” ha rialo mosadimoholo.

“Ke leboha haholo,” ha rialo Matty a thabile. Apole e tshehla e ne e le kgolo ho feta tsena tse ding e bile e le ntle ho feta tseo a kileng a di bona. Jwale o ne a tatsetse ho fihla hae a lo e kenya leino.

Ha letsatsi le ya madikelong, Matty a kgutlela polasing ya hae. Yaba ka makgethe ohle o hlopha diapole kaofela le ho di hlatswa, a binela ka marameng ka thabo ha a ntse a sebetsa jwalo. O ne a tlo baka dimonamona tseo a di nahanneng kaofela, ebe o behella ka thoko apole e kgethehileng e tshehla ho tla iputsa ka yona.

Ha Matty a se a qetile ho hlopha le ho hlatswa diapole kaofela, a nka apole e kgethehileng e tshehla. “Jwale ke a iputsa ha ke etsa tjena,” a rialo. Empa moo a reng o e kenya leino, ha runya hloohonyana mokoting wa apole.

“Se ka ntja hle!” ha lla seboko.

Apole ya wa letsohong la Matty ke ho makala. “Ke mehlolo ya eng?” a rialo ka ho makala.

Seboko a tswa a meneka, a tsweretse mahlo a tletseng maswabi. “Ke kopa tshwarelo ka ho hlafuhlafuna apole ya hao, ke hobane e monate haholo!” a rialo.

Matty a utlwa a sa tsebe hore na a kwate kapa tjhe. Mosadimoholo o ne a itse apole eo e tla dula e mo tlisetsa thabo, empa jwale ha a sa kgodisehile ka seo.

Qetellong Matty a hemela hodimo mme a re, “Sebokonyana towe, kannete o lehlohonolo hobane kajeno ke thabile. E re ke tjhekele apole ena ya hao mobung ka mora ntlo e le hore o itjelle yona ka kgotso, o sa kgathatswe ke dinonyana.”

Ha Matty a kenya apole ka mokoting oo a o tjhekileng fatshe, seboko a re, “Sala hantle Matty. Ke tshepisa hore ke tla o putsa ka mosa ona wa hao.” Matty a mo sadisa hantle mme a kgutlela ka tlung ho ya baka.

Ka letsatsi le hlahlamang, ha mafube a hlaha, Matty a tsoswa ke monko o monate ka ho fetisisa oo a kileng a o utlwa. A tswela kantle ka potlako mme a makala ho makala. Ka pela hae ho ne ho eme sefate se seholohadi sa diapole, makala a sona a imetswe ke diapole tse ntle ka ho fetisisa tseo a kileng a di bona.

Matty a tantsha ho potapota sefate, setsheho sa hae se tswakana ha monate le mmino wa dinonyana. A kga diapole ka bomong, a hloletswe ke mohlolo o etsahetseng bosiu.

Mantsiboyeng ao, Matty a kgutlela sefateng, a beha mafene e sa tswa bakwa motsong wa sona. “Ke a leboha,” a rialo a buela tlase. “Mosadimoholo o ne a nepile hobane ka nnete sefate sena se tla ntlisetsa thabo!”

Eba mahlahahlaha ka pale!

Tholwana eo o e ratang ka ho fetisisa ke efe? Toroya setshwantsho sa yona. Ka tlasa seo o se toroileng, ngola polelo e reng “Tholwana eo ke e ratang ka ho fetisisa ke …” O ka kopa motho e mong hore a o thuse ho ngola polelo eo ya hao.
Etsa lethathamo la dintho kaofela tseo o ka di etsang ka tholwana eo o e ratang ka ho fetisisa. E ka ba ntho e kang eo o e bakileng kapa o e phehileng, jusi kapa phuding e batang.
Nahana ka monko, tatso, sebopeho le mmala wa apole kapa tholwana e nngwe. Nahana ka modumo oo e tlo o etsa ha o e loma. Jwale ngola thothokiso ka tholwana eo.