Home | Story Resources | Multilingual stories | Ḓuvha ḽi sa hangwei

Ḓuvha ḽi sa hangwei

Author

Lorato Trok

Illustrator

Rico

Translator

Alugumi Rathumbu

“Ṱavhanyani, Neo, a ri tshena tshifhinga!” hu amba Hope a tshi khou vhea fhasi mukhwama u lemelaho. Hope na Josh vho vha vho lindela Neo. Vhoṱhe vho vha vha tshi khou ya phakhani sa tshipiḓa tsha maano a Hope!Hope o mbo thoma u vhamba maano nga murahu ha u vhala bugu ntswa ye mme awe vha mu rengela. Yo vha i tshi amba nga ha musidzana we a tsireledza muvhundu wa hawe kha ḓithu ḽi shushaho. Hope o ḓiphiṋa nga iyo bugu lwe zwa ita uri a i fhedze nga ḓuvha ḽithihi nahone o ita na u lora nga ha ḓithu ḽi shushaho vhusiku uho!

“Ndi a fulufhela uri maano e na ri vhambela a ḓo nyanyula. Ndi ngani no dzhaya?” Neo u vhudzisa Hope zwenezwi a tshi khou vala munango wa nga phanḓa. Neo o vha o ambara muṅadzi wawe a u funesaho wa ḽihokokolwanzhe na phetsho ya iṱoni.“Nṋe sa inwi a thi ḓivhi tshithu, Neo. Hope o nkhumbela uri ndi ḓe na khaithi yanga phakhani,” hu amba Josh a tshi khou sumba khaithi yawe.

“Fulufhelani, ni ḓo ḓiphiṋa nga hezwi!” hu amba Hope zwenezwi a tshi khou tshimbilela phanḓa ha khonani dzawe. Neo na Josh vho tevhela, vha tshi khou lingedza u tshimbila nae fhethu huthihi.Musi vha tshi swika phakhani, vho vhona ṋeḓorobo o kuvhanganelwa nga gogo ḽihulu ḽa vhathu. “Hu khou itea mini?” Josh u vhudzisa muṅwe mufumakadzi o imaho henefho tsini.

“Inwi, ndi kale ṋeḓorobo a tshi khou ṱanganedza mbilaelo nnzhi nga ha uri a hu na mirunzi minzhi phakhani,” u ralo. “Zwenezwo, o mbo ḓi ita uri hu ṱavhiwe miri miswa minzhi nahone ṋamusi u fhano u ḓo pembelela izwi na vhathu vhoṱhe.”“Evho! Phakha yo dalesa lune maano anga ha nga ḓo shuma,” hu amba Hope, o kulea nungo.

“Maano a mini?” hu vhudzisa Neo na Josh mazha, vha tshi khou sedzana.“Ni a humbula tshiṱori tshe nda vhala nga ha musidzana wa muhali we a tsireledza muvhundu wa hawe?” hu vhudzisa Hope. “Fhedzi ha, ndo vha ndi khou lavhelela uri ri ḓo ita ḓithu ḽi shushaho, ra ḽi vhofhelela kha khaithi ya Josh ra kona ha u i fhufhisa nga henefha nṱha phakhani. Zwino vhonani!” hu amba Hope a tshi sumba kha vhathu vho imaho vho kuvhanganela ṋeḓorobo nga dakalo.

Neo o mbo vhona uri Hope o ṱungufhala hani. “Hope, ndi maano avhuḓi!” u ralo. “Kha ri ṱutshele hangei murahu ha ḓaka ḽihulu. A hu na ane a ḓo ri vhona.” Josh na Hope vha tenda nga ṱhoho nahone vha mbo ḓi ya.“Josh, iyani u ṱoḓa zwitanda. Neo, bvulani muṅadzi waṋu wa ḽihokokolwanzhe na phetsho ya iṱoni,” Hope u ṋea ndaela a tshi khou bvisa zwiambaro zwawe zwa karati na baḽoni ngomu mukhwamani wawe.Josh a wana zwitandana zwisekene tsini ha gokoko ḽa mathukhwi nahone khonani tharu dza mbo dzula murahu ha zwiṱaka hu tshi khou shumiswa muḓali u bvaho ngomu ha mukhwama wa Hope u vhofhekanya zwitandana nga tshivhumbeo tsha tshifhambano u sika muvhili wa ḓithu. Hope o mbo ḓadza muya ngomu ha baḽoni a ḽi vhofhelela kha ṱhoho ya ḓithu.

Vha ambadza ḓithu nga zwiambaro zwa Hope zwa karati na nga muṅadzi wa Neo wa ḽihokokolwanzhe na phetsho ya iṱoni. Josh a vhofhelela ḓithu kha khaithi yawe. Na zwenezwo vha vha vho no ḓilugisela!

Vhana vho dzumbama murahu ha zwiṱaka vha vhofholola thambo ya khaithi. Muya wa maanḓa u rotholaho wa mbo fhufhisela ḓithu muyani. Nṱha, nṱha, nṱha ḽa mbo ḓi ya, ḽi khou ralo u ṱutshela kule navho.Nga tshenetsho tshifhinga, Bella na mme awe vho vha vho swika phakhani u onyolosa milenzhe ya Noodle. Musi Noodle i tshi vhona ḓithu ḽi khou fhefheḓa muyani, ya thoma u huvha na u kokodza thambo ye ya vhofhiwa ngayo. Bella o lingedza u fara o khwaṱhisa kha thambo yo vhofhaho Noodle, fhedzi yone ya kokodza nga maanḓa u swikela a tshi litshedza. Noodle ya mbo ḓi ya na phakha. Bella na mme awe vha i gidimedza nga murahu.

Zwenezwo ḓithu ḽa mbo thoma u fhefheḓa ḽi tshi tsa fhasi ḽi tshi yela thungo lwa ṱhoho ya ṋeḓorobo zwenezwi a khou ṋea muvhigo! Noodle yo vha i tshi khou gidima i tshi yela thungo lwa ṋeḓorobo i tshi khou ralo u huvha ḓithu – ngeno Bella na mme awe vha murahu fhedzi vha si kule.

Josh a kokodza thambo ya khaithi, a khou lingedza uri ḓithu ḽi vhuelele hafhu nṱha muyani, fhedzi o vha o no lenga. Noodle ya fhufhela nṱha kha ḓithu, i tshi khou thula ṋeḓorobo. Zwipiḓa zwa mabambiri zwi re na tshipitshi tsha ṋeḓorobo khazwo zwa hasekana phakha yoṱhe, ngeno vhathu vha khou shavhela masia o fhambanaho.

Neo, Josh, Hope, Bella na mme awe vha gidimela uyo thusa. Vho wana ṋeḓorobo a fhasi tsini ha ḓithu ngeno Noodle i khou endela u huvha ḓithu. Vhana vho thusa u dzikisa Noodle ngeno mme a Bella vho thusa u vusa ṋeḓorobo.

Zwenezwo Hope a ṱalutshedza uri ndi ngani maano awe a songo tshimbila zwavhuḓi. Ṋeḓorobo a thetshelesa, nahone musi Hope o fhedza, a sokou mu lavhelesa … a mbo thoma u sea. “Zwino ni nga kona u ṅwala tshiṱori tshaṋu tsha ḓithu ḽi shushaho,” ṋeḓorobo vha dzinginya.

Na musi maano a Hope a songo tou shuma zwavhuḓi, ho vha ḓuvha ḽine vhoṱhe vha ḓo ḽi humbula!