Home | Story Resources | Multilingual stories | Siku leri ri nga rivalekiki

Siku leri ri nga rivalekiki

Author

Lorato Trok

Illustrator

Rico

Translator

Tsakani Nkwe

“Hatlisa, Neo, a ha ha ri na nkarhi!” ku vula Hope a ri karhi a rhula nkwama wa yena lowo tika. Hope na Josh a va yimele Neo. Hinkwavo a va ya ephakeni tanihi xiphemu xa rhengu ra Hope!Hope u sungule ku luka rhengu leri endzhaku ka loko a hlaye buku yintshwa leyi a nga yi xavela hi mana wa yena. A yi vulavula hi nhwanyana loyi a nga va ni vurhena kutani a ponisa tiko ra ka vona eka xivumbiwa lexo chavisa. Hope u tiphine hi buku leyi swinene lero u yi hete hi siku rin’we laha a nga tlhela a lorha hi xivumbiwa lexo chavisa vusiku byebyo!

“Ndzi tshemba leswaku leswi u nga hi lulamisela swona swi ta tsakisa. Hikwalahokayini u jahile swonghasi?” Neo a vutisa Hope loko a ri karhi a pfala rivanti ra le mahlweni. Neo a ambale xigqoko xa yena lexi a xi rhandzaka xa makhamba na xipfalatihlo.“A ndzi tivi nchumu ndzi tifanela na wena, Neo. Hope u ndzi kombele ntsena leswaku ndzi ta na khayiti ya mina ephakeni,” ku vula Josh a ri karhi a kombetela khayiti ya yena.

“Ndzi tshembeni, mi ta tiphina!” ku vula Hope a ri karhi a hatlisa ku ya rhangela vanghana va yena. Neo na Josh va landzelela, va ringeta ku n’wi kuma.Loko va fika ephakeni, va vona meyara a rhendzeriwile hi ntshungu lowukulu wa vanhu. “Ku humelela yini?” Josh a vutisa wansati loyi a yimile kwala kusuhi.

“Hi swona, i khale, meyara a ri karhi a kuma swivilelo swa leswaku a ku na mindzhuti yo ringanela ephakeni,” a vula. “Hikwalaho, u tiyisisile leswaku ku byariwa misinya leyintshwa leyo tala naswona namuntlha u tile ku ta tlangela leswi na un’wana na un’wana.”“Yhoo e-e! Phaka yi tele ngopfu leswaku rhengu ra mina ri tirha,” ku vula Hope, a tsanile.“Rhengu rihi?” ku vutisa Neo na Josh xikan’we, va langutanile.

“Ma ha wu tsundzuka ntsheketo lowu ndzi nga wu hlaya mayelana na nhwanyana wa nhenha loyi a nga ponisa tiko ra ka vona?” ku vutisa Hope. “Ma tiva, ndzi navela leswaku hi endla xivumbiwa xo chavisa, hi xi bohelela eka khayiti ya Josh kutani hi xi hahisa ehenhla ka phaka. Kambe sweswi vonani!” ku vula Hope hi ku kombetela eka vanhu lava a va tsakile va rhendzele meyara.Neo a ku vona ku tsana ka Hope. “I makungu ya kahle, Hope!” a vula. “A hi fambeni lahaya ndzhaku ka khwati leriya rikulu. A ku na munhu loyi a nga ta hi vona lahaya.” Josh na Hope va pfumela hi tinhloko kutani va famba.

“Josh, famba u ya lava swimhandzana. Neo, hluvula xigqoko xa wena xa makhamba na xipfalatihlo xa wena,” ku lerisa Hope loko a ri karhi a humesa mpahla ya yena ya karati na baluni enkwameni.Josh u kume swimhandzana swo lala kusuhi na thini ra thyaka hiloko vanghana lavanharhu va tshama endzhaku ka xihlahla va tirhisa ntambhu leyi a yi ri endzeni ka nkwama wa Hope va swi bohelela swin’we swi endla xivumbeko xa xihambano ku endla miri wa xivumbiwa. Endzhaku Hope a pfurhetela baluni a yi bohelela ku endla nhloko ya xivumbiwa.

Va ambarisile xivumbiwa mpahla ya Hope ya karati na xigqoko xa makhamba xa Neo na xipfalatihlo. Josh a bohelela xivumbiwa eka khayiti ya yena. Se a va lulamile!

Vana va tumbele endzhaku ka xihlahla va chucha ntambhu ya khayiti. Moya lowukulu wa matimba wu rhwala xivumbiwa lexiya xi ya ehenhla emapapeni. Xi ya ehenhla, ehenhla, ehenhla xi tsemakanya mapapa ekule na vona.

Hi nkarhi walowo, Bella na mana wa yena a va fikile ephakeni ku ta rhendzelekisa Noodle. Loko Noodle a vona xivumbiwa lexi xi ncikinyaka emapapeni, a sungula ku vukula na ku koka ntambhu yo lawula ku n’wi fambisa. Bella a ringeta ku khoma ntambhu ya Noodle, kambe a koka hi matimba ku kondza a n’wi tshika a famba. Noodle a tsutsuma a tsemakanya phaka. Bella na mana wa yena va n’wi hlongorisa hi le ndzhaku.

Endzhaku xivumbiwa xi sungula ku phaphamala xi rhelela xi kongomile nhloko ya meyara loyi a ri karhi a vulavula! Noodle a tsutsuma a n’wi kongomile a ri karhi a vukula xivumbiwa – Bella na mana wa yena a va nga ri kule.Josh a koka ntambhu ya khayiti, a ringeta ku gonyisela xivumbiwa ehenhla emapapeni, kambe a hlwerile. Noodle a tlulela ehenhla eka xivumbiwa, a tlumba meyara. Swipetlu swa phepha ra mbulavulo lowu meyara a wu hlaya swi haha na phaka hinkwayo, kutani vanhu va sungula ku tsutsuma hi matlhelo hinkwawo.

Neo, Josh, Hope, Bella na mana wa yena va tsutsuma ku ya pfuna. Va kume meyara a ri ehansi kusuhi na xivumbiwa na Noodle loyi a ha xi vukula. Vana va pfuneta ku khongotela Noodle loko mana wa Bella a ri karhi a pfuna meyara ku pfuka.

Endzhaku Hope a hlamusela rhengu ra yena na hilaha ri nga hoxekisa xiswona. Meyara a yingisela, endzhaku loko Hope a hetile, a n’wi languta kunene … hiloko a sungula ku hleka. “Swi lulamile, sweswi u nga tsala ntsheketo wa wena hi xivumbiwa lexo chavisa,” ku ringanyeta meyara.

Hambileswi rhengu ra Hope ri nga kala ri nga tirhangi hi ku hetiseka, ri ve siku leri va nga ta ri tsundzuka hinkwavo!