Siku rin’wana, khale ka khaleni, N’wanghala u hlawuriwe leswaku ku va yena hosi ya nhova. Siku ra kona, N’wamangwa u hlengelete swiharhi hinkwaswo ivi a ku, “A hi endleni nkhuvo wa ku amukela hosi ya hina leyintshwa.” “I mhaka ya kahle ngopfu,” ku vula N’wayingwe. “Ndzi ehleketa leswaku N’wangwenya hi yena a faneleke a cina na hosi hi siku ra xinkhubyana.” “Mina ndza swi seketela,” ku vula N’wankolobyana. “Kambe loko N’wangwenya a ta cina na hosi, u fanele a ya hlamba enambyeni leswaku dzovo rakwe ri ta basa ri tlhela ri hatima ku fana ni ra mina.” Swiharhi hinkwaswo swi pfumelelane na N’wankolombyana. Dzovo ra N’wangwenya a ri gwanyile ri tlhela ri kwalala. A a fanele a ya hlamba enambyeni leswaku dzovo rakwe ri ta basa ri tlhela ri hatima, leswaku a ta cina na hosi leyintshwa. Kambe mbuyangwana N’wangwenya a nga pfumelanga. “A ndzi nge swi koti ku hlamba enambyeni!” ku huwelela N’wangwenya. “A ndzi si tshama ndzi ya enambyeni. A ndzi tivi niloko ndzi swi kota ku hlambela!” Kambe a ku na xiharhi lexi nga yingisa N’wangwenya. Hinkwaswo swi hangalakile swi muka.

N’wangwenya u sale a ri yexe. A a karhateka hileswaku swiharhi hinkwaswo swi ta n’wi hleka ku vava loko a nga swi koti ku hlambela. Xana a swi ta kotekisa ku yini leswaku dzovo rakwe ri basa ri tlhela ri hatima loko a nga koti ku ya hlamba enambyeni? Kutani u te na rhengu. “Ndzi ta ya enambyeni nivusiku loko swiharhi hinkwaswo swi etlele. Kutani a ku na lexi nga ta ndzi vona loko ndzi ringeta ku hlambela.” Hi vusiku byebyo, loko swiharhi hinkwaswo swi etlele, N’wangwenya u rhelele enambyeni. A a ehleketa leswaku a ku na lexi n’wi vonaka, kambe a a rivele leswaku N’waxikhovha a nga etleli navusiku! N’waxikhovha a a hlalerile loko N’wangwenya a rhelela hi vukheta a nghena enambyeni ivi a dyondza ku hlambela. Kambe N’waxikhovha a nga banga huwa. Siku ra nkhuvo ri hetelele ri fikile. Swiharhi hinkwaswo swi hlangane ndhawu yin’we. “Ku na loyi a tivaka leswaku N’wangwenya u kwihi?” ku vutisa N’wankolombyana a ri karhi a halahala hi mahlo. “Ndza tshemba leswaku u basile a tlhela a hatima leswaku a ta cina na hosi.” Kambe a swi nga tiviwi leswaku N’wangwenya u le kwihi. Hiloko N’waxikhovha a ku, “Ndzi ehleketa leswaku ndza ku tiva lomu a nga kona. Ndzi saleni endzhaku!” Swiharhi hinkwaswo swi sale N’waxikhovha endzhaku loko a haha a kongoma enambyeni. Loko swi fika enambyeni swi kume N’wangwenya a hlundzukile naswona a hele matimba. A a hete masiku a ri enambyeni, kambe dzovo rakwe a ra ha gwanyile, a ri nga basanga hambi ku ri ku hatima. 

“Huma enambyeni phela,” ku huwelela swiharhi hinkwaswo. “Nkhuvo wu ta sungula ku nga ri khale naswona wena u fanele u ya cina na hosi!” 

“Doo, a swi nge koteki!” ku hlamula N’wangwenya. “Naswona loko ku va na loyi a tshinelaka enambyeni, ndzi ta n’wi bvanyangeta ndzi n’wi dya. Mi ndzi hlundzukise ngopfu hinkwenu ka n’waina.” Hi swona swi endlaka leswaku N’wangwenya a tshama enambyeni ku ta fika namuntlha. Dzovo rakwe ra ha gwanyile naswona wa ha hlundzukile swinene. Naswona a xi kona xiharhi lexi tshinelaka ekusuhi na yena. Hinkwaswo swi chava leswaku swi nga bvanyangetiwa swi dyiwa hi N’wangwenya!

Endla ntsheketo wu nyanyula!

•   N’wangwenya a a chava leswaku swiharhi leswin’wana swi ta n’wi hleka, kutani a ya enambyeni a ri yexe. Xana u vona swi ri kahle ku ya kun’wana u ri wexe u nga byelanga munghana kumbe xirho xa ndyangu lomu u yaka kona?
•   Ha yini N’wangwenya a hlundzukele swiharhi leswin’wana? Xana u vona onge a a ri na xivangelo lexi twalaka xa ku hlundzuka? Ha yini swi nga ri kahle leswaku u hlundzukela van’wana nkarhi wo leha?