Ngalelinye lilanga, kadzeni, Libhubesi lakhetfwa kutsi libe yinkhosi yelihlatsi. Ngalelo langa, Lidvuba labutsela ndzawonye tonkhe leti letinye tilwane latsi, “Asibeni nephathi kuze sibungate inkhosi yetfu lensha.” “Ngumbono lomuhle loyo,” kusho Ingwe. “Ngicabanga kutsi iNgwenya kufanele kube ngiyo lejayiva nenkhosi ngelilanga lalephathi.” “Ngiyavumelana naloko,” kusho uMgololo. “Kodvwa nangabe iNgwenya kutawudzingeka kutsi ijayive nenkhosi, kufanele igeze emfuleni kuze sikhumba sayo sihlobe futsi simanyatele, njengalesi sami.” Tonkhe tilwane tavumelana neMgololo. Sikhumba seNgwenya sasimphunga futsi sigugile. Kwakudzingeka igeze emfuleni kuze sikhumba sayo sihlobe futsi simanyatele kuze ijayive nalenkhosi lensha. Kodvwa iNgwenya yala. “Angeke ngigeze kulomfula!” kukhala iNgwenya. “Angikake ngaba kulomfula. Angati nekutsi ngingakhona yini kubhukusha!” Kodvwa kute silwane lesalalela loko bekushiwo yiNgwenya. Tonkhe tawushiya lomhlangano taya ekhaya.

INgwenya yasala yodvwa. Yayikhatsatekile kutsi tonkhe letilwane titayihleka nayingakhoni kubhukusha. Sikhumba sayo singahloba futsi simanyatele njani nangabe ingakwati kugeza emfuleni? Ngako yacabanga lisu. “Ngitawuya emfuleni ebusuku ngesikhatsi tonkhe tilwane setilele. Ngako kute lesitangibona ngetama kubhukusha.” Ngalobo busuku, ngesikhatsi tonkhe letinye tilwane setilele, iNgwenya yaya emfuleni. Beyicabanga kutsi kute loyibonako, kodvwa beyikhohliwe kutsi Sahhukulu asilali ebusuku! Sahhukulu besibukele njengoba iNgwenya ingena ngekucophelela emfuleni futsi ifundza kubhukusha. Kodvwa Sahhukulu sathula sangawubangi umsindvo. Ekugcineni lefika lilanga lephathi. Tonkhe tilwane tabutsana endzaweni yekuhlangana. “Kukhona yini lowatiko kutsi ikuphi iNgwenya?” Kubuta uMgololo njengoba ucalata. “Ngiyetsemba kutsi ihlobile futsi iyamanyatela kuze ijayive nenkhosi.” Kodvwa kute lobekati kutsi iNgwenya ikuphi. Sahhukulu satsi, “Ngicabanga kutsi ngiyati kutsi ikuphi. Ngilandzeleni!” Tonkhe tilwane talandzela Sahhukulu njengoba sindiza siya ngasemfuleni. Emfuleni, takhandza iNgwenya itfukutsele futsi ilusizi. Beseyibe sekhatsi emfuleni emalanga, kodvwa sikhumba sayo sasisolo simphunga, singakahlobi futsi singamanyateli nakancane. “Sicela uphume lapha emfuleni,” kumemeta tonkhe letilwane. “Iphathi seyitawucala futsi kufanele ujayive nenkhosi!

“Cha, angeke” kuphendvula iNgwenya. “Futsi nangabe lotsite asondzela eceleni kwemfula, ngitamudla. Nonkhe ningente ngatfukutsela kabi.” Futsi kungako kuze kube ngulamuhla, iNgwenya ihlala emantini. Sikhumba sayo solo sicinile futsi solo itfukutsele kakhulu. Futsi kute silwane lesisondzela kuyo. Tiyesaba kutsi iNgwenya ingase itidle!

Yenta indzaba ibe nemdlandla!

• INgwenya beyesaba kutsi leti letinye tilwane titayihleka, ngako yahamba yodvwa kuya emfuleni. Ucabanga kutsi kuyintfo lekahle kutsi uhambe uye endzaweni letsite ngaphandle kwekutjela umngani noma lilunga lemndeni kutsi utawube ukuphi?
• Kungani iNgwenya yayititfukutselele leti letinye tilwane? Ucabanga kutsi beyinaso sizatfu lesivakalako sekutfukutsela? Kungani kungasiyo intfo lekahle kutsi ubatfukutselele sikhatsi lesidze labanye?