Ka letšatši le lengwe, kgalekgale, Tau e ile ya kgethwa gore e be kgoši ya lešoka. Letšatšing leo, Pitsi e ile ya kgoboketša diphoofolo ka moka gomme ya re, “A re direng moletlo wa go lebogiša kgoši ya rena e mpsha.” “Yeo ke kgopolo e botse,” gwa realo Lepogo. “Ke nagana gore Kwena e be yena a binago le tau ka letšatši leo la moletlo.” “Ke laka leo,” gwa realo Mokgaditswane. “Eupša ge e ba Kwena a tlo bina le kgoši, o swanetše go hlapa nokeng gore letlalo la gagwe le hlweke le go phadima go swana le le laka.” Diphoofolo ka moka di ile tša dumelelana le Mokgaditswane. Letlalo la Kwena le be le na le makgwakgwa a mantši e bile le sehlefetše. E be e swanetše go hlapa nokeng gore letlalo la yona le hlweke le go phadima gore e tle e kgone go bina le kgoši e mpsha. Eupša Kwena ya batho e ile ya gana. “Nka se hlape ka nokeng!” ya realo Kwena e lla. “Ga sa nka ka tsena ka nokeng. Ga ke tsebe ge e ba ke tla kgona go rutha!” Eupša diphoofolo ga se tša ka tša theeletša Kwena. Ka moka di ile tša tloga sebokeng seo tša ikela magae.
Kwena e ile ya šala e nnoši. E be e tshwenyegile kudu gore diphoofolo tše dingwe di tlo e sega ge e ka palelwa ke go rutha. Letlalo la yona le be le tla hlweka bjang le go phadima ge e ka se hlape ka nokeng? Ke moka e ile ya loga leano. “Ke tla ya nokeng bošego ge bohle ba robetše. Ga go yo a tlago go mpona ge ke leka go rutha.” Bošegong bjoo, ge diphoofolo ka moka di robetše, Kwena e ile ya theogela nokeng. E be e nagana gore ga go yo a e bonago, eupša e be e lebetše gore Leribiši le be le se la robala! Leribiši le ile la bogela Kwena ge e dutše e tsena ka nokeng ka go nanya gomme e ithuta go rutha. Eupša Leribiši ga sa nka la hlaba lešata.
Mafelelong, letšatši la moletlo le ile la fihla. Diphoofolo ka moka di ile tša kgobokana kgorong. “Naa go na le yo a tsebago gore Kwena o gokae?” Gwa botšiša Mokgaditswane a dutše a gadima gohle. “Ke tshepa gore o hlwekile le go phadima gore a tlo bina le kgoši.” Eupša go be go se na yo a tsebago gore Kwena e kae. Leribiši le ile la re, “Ke nagana gore ke tseba mo a lego. Ntšhaleng morago!” Diphoofolo ka moka di ile tša šala Leribiši morago ge le dutše le fofela thoko ya noka. Kua nokeng, diphoofolo di ile tša hwetša Kwena a galefile e bile a ferekane. O bile kamoo nokeng matšatši a mantši, eupša letlalo la gagwe le be le sa tletše makgwakgwa, le se la hlweka le go phadima. “Hle, etšwa kamoo nokeng,” gwa goeletša diphoofolo ka moka. “Moletlo o kgauswi le go thoma gomme o swanetše go bina le kgoši!”
“Aowa, nka se ke!” gwa realo Kwena. “Yo a kago leka feela a batamela mo nokeng, ke tlo mo ja. Ka moka ga lena le nkgalefišitše kudu.” Ke ka baka leo, go fihla le lehono, Kwena e phelago ka nokeng. Letlalo la yona le sa tletše makgwakgwa e bile e sa galefile kudu. E bile ga go na diphoofolo tšeo di batamelago kgauswi le yona. Ka moka ga tšona di boifa kudu gore Kwena e ka di ja!
Dira gore kanegelo e be le bophelo!
- Kwena e be e tšhaba gore diphoofolo tše dingwe di tlo e sega, ka gona e ile ya ya nokeng e nnoši. Naa o nagana gore go lokile go ya felotsoko o nnoši ntle le go botša mogwera wa gago goba setho sa lapa gore o ya kae?
- Ke ka baka la’ng Kwena e galefetše diphoofolo tše dingwe? Naa o nagana gore lebaka la yona la go galefa le a kwagala? Ke ka baka la’ng go dula o galefetše batho ba bangwe go sa loka?
