Ḽiṅwe ḓuvha, kale-kale, Ndau yo khethiwa uri i vhe khosi ya ḓakani. Nga ḽeneḽo ḓuvha, Mbiḓi ya kuvhanganya zwipuka zwoṱhe, ya ri, “Kha ri ite tshimima ri pembelele khosi yashu ntswa.” “Ndi muhumbulo wavhuḓi hoyo,” ḽa ralo Didingwe. “Ndi vhona u nga Ngweṋa ndi yone ine ya tea u tshina na khosi nga ḓuvha ḽa tshimima.” “Ndi ḽanga ḽeneḽo,” hu amba Tswina. “Fhedzi arali Ngweṋa i tshi ḓo tshina na khosi, i tea u ṱamba mulamboni uri lukanda lwayo lu kune na u penya, vhunga lwanga.” Zwipuka zwoṱhe zwa tendelana na Tswina. Lukanda lwa Ngweṋa lwo vha lu tshi hwasa nahone lu sa penyi. Yo vha i tshi tea u ṱamba mulamboni uri lukanda lwayo lu kune na u penya uri i kone u tshina na khosi ntswa. Fhedzi Ngweṋa ya khuvhe ya tou dadadza tshoṱhe. “Ḽa ḓa hafha ḽi a kovhela, ndi nga si ṱambe mulamboni nṋe lini!” ya ralo Ngweṋa i tshi khou gungula. “A thi athu vhuya nda dzhena mulamboni na luthihi. Nahone a thi koni na u bammbela!” Fhedzi a hu na tshipuka tshe tsha thetshelesa Ngweṋa. Zwipuka zwoṱhe zwo mbo ḓi ṱuwa zwa livha mahayani azwo. 

Ngweṋa ya sala i yoṱhe yo sokou duu. Ya vhilaedziswa vhukuma nga ḽa uri vhoṱhe vha ḓo i sea arali i sa koni u bammbela. Zwo vha zwi tshi ḓo konadzea hani uri lukanda lwayo lu kune na u penya arali ya sa ṱamba mulamboni? Ndi izwi-ha i tshi luka maano. “Ndi ḓo ya mulamboni vhusiku musi vhoṱhe vho eḓela. Arali nda ita zwenezwo a hu na ane a ḓo mmbona musi ndi tshi khou lingedza u bammbela.” Honoho vhusiku musi zwipuka zwoṱhe zwo eḓela, Ngweṋa ya theutshela mulamboni. Yo vhona u nga a hu na ane a khou i vhona, fhedzi yo vha yo hangwa uri Gwitha ḽo vha ḽi sa eḓeli vhusiku! Gwitha ḽa lavhelesa musi Ngweṋa i tshi redzemutshela mulamboni nga vhulondi uri i gude u bammbela. Fhedzi Gwitha ḽa tou hwii, ḽa sa ite phosho na luthihi. Ḓuvha ḽa tshimima ḽa fheleledza ḽo swika.

Zwipuka zwoṱhe zwa kuvhangana fhethu hune muṱangano wa ḓo farelwa hone. “Ngweṋa i ngafhi mathina?” Tswina ya vhudzisa i tshi khou sedza-sedza hoṱhe. “Kha ri fulufhele uri yo kuna nahone i khou penya uri i kone u tshina na khosi.” Fhedzi ho vha hu si na a ḓivhaho uri Ngweṋa i ngafhi. Gwitha ḽa ri, “Ndi vhona u nga ndi a ḓivha uri i ngafhi. Ntevheleni!” Zwipuka zwoṱhe zwa tevhela Gwitha musi ḽi tshi fhufha ḽo livha mulamboni. Musi vha tshi swika mulamboni, vha wana Ngweṋa yo sinyuwa na u dinalea. Yo vha yo fhedza maḓuvha manzhi mulamboni, fhedzi lukanda lwayo lwo vha lu tshi kha ḓi hwasa, lu songo kuna nahone lu sa penyi na luthihi. “Ibvani mulamboni zwaṋu, ri khou tou humbela,” zwipuka zwoṱhe zwa huwelela. “Tshimima tshi tsini na u thoma, hafhu ni tea u tshina na khosi!” 

“Hai, na luthihi, zwi nga si ite!” hu fhindula Ngweṋa. “Nahone arali muṅwe wa vhoiwe a sendela hafha tsini na mulambo, ndi ḓo mu zhongondedza. No ntsinyusa zwihulu vhoiwe noṱhe.” Ndi ngazwo u swika na ṋamusi Ngweṋa i tshi dzula maḓini. Lukanda lwayo lu kha ḓi hwasa nahone i dzula yo sinyuwa zwihulu. Zwipuka zwoṱhe a zwi sendeli na luthihi tsini nayo. Zwi ofha uri Ngweṋa i ḓo zwi zhongondedza!

Itani uri tshiṱori tshi nyanyule!

•   Ngweṋa yo vha i tshi ofha uri zwiṅwe zwipuka zwi ḓo i sea, nga zwenezwo ya ya mulamboni i yoṱhe. Ni vhona u nga ndi zwavhuḓi u ya huṅwe fhethu ni noṱhe ni songo vhudza khonani yaṋu kana muṅwe muthu hayani hune na ḓo vha ni hone?
•   Ndi ngani Ngweṋa yo vha yo sinyutshela zwiṅwe zwipuka? Ni vhona u nga yo vha i na tshiitisi tshi pfalaho tsha u sinyuwa? Ndi ngani zwi songo tea u fhedza tshifhinga tshilapfu no sinyutshela vhaṅwe?