Ngelinye ilanga, eplasini elikude, bekunomntazana omuhle ibizo lakhe linguSefako. USefako bekakara amadoda amanengi eplasini lalapho. Bebamtlolela iinkondlo neengoma zokukwakwazela ubuhle bakhe. Kodwana uSefako bekanganakareko yokutjhada namunye wabo, begodu loku kwenza uyise wasilingeka ngombana bekacabanga bona indodakazakhe seyikulungele ukuba nomuzayo.
USefako lo ebekangakwazi kukuthi bekanekareko eyifihlo engakajayeleki! Ikareko eyifihlo leyo bekuyingwenya ehlala emlanjeni lapho ebekakha khona amanzi. Mihle namalanga, ema-awareni ambalwa ngaphambi kokutjhinga kwelanga, uSefako bekehlela emlanjeni nomjeka wakhe wokukha amanzi nokudla kwakhe kwantambama.
USefako bekanomukghwa wokubetha isithongwana ngaphasi komuthi awuthandako ngemva kokukha amanzi ngemlanjeni. Ingwenya beyivame ukubhaca ngemanzini imbukele nakaleleko. Beyihlala ilulukela ukukhuluma naye kodwana ingazi bona ingalifunyana njani ithuba lokwenza njalo ngaphandle kokumthusa.
Ngelinye ilanga, ingwenya yaqina isibindi yatjhidela kuSefako ngemva kobana sekalele. Ingwenya esemathandweni yathaba yabhembesa nayizibona ihlanu kwaka-Sefako kangangobana yathoma nokucula ngendlela emthanda ngayo.
USefako wezwa ingoma emnandi begodu waphaphama, acabanga bona uyabhudanga. Ingwenya beyingafuni uSefako aphaphame ayibone, yeke yatjhingela ngemanzini ngokurhabako.
Lokhu kwenzeka godu ngakusasa … kwabuye kwenzeka … kwenzeka godu ngokulandelako. USefako bekezwa ingwenya imculela ingoma nakaleleko kodwana nakavukako, angaboni muntu. Ebekakuzwa makari wemithi arhwatjhazelako neenkomo eziwumuzako kude.
Ingoma yamthinta ihliziyo, begodu uSefako bekahlala afuna ukubona umculi wayo. Yeke, uSefako wathoma ukufunisisa ngephimbo elimnandeli hlangana nemihlanga, imithi notjani kodwana azange afunyane litho.
Ngelinye ilanga, uSefako waqunta bona angeze asazitshwenya ngokufunisisa ngephimbo lelo. Kunalokho, wahlela ukufuna umnikazi wephimbo elimnandi!
USefako wakha amanzi ngemlanjeni njengemhleni bese wayokucambalala ngaphasi komuthakhe awuthandako wazenza kwanga ulele ubuthongo. Njengemhleni, ingwenya itjhiswa lithando yarharhabela ngaphandle komlambo iyomculela.
USefako nakezwa iphimbo elimnandi, wavula amehlwakhe ngokurhabako begodu wazifunyana aqalene … NENGWENYA ngemehlweni!
USefako bekathukwe ahlengezela! Wathi uyeqa, wararha umjeka wakhe, kwaphalaka woke amanzi ebekawakhileko. Wathoma wabaleka akhuphuka ngerharheni, kodwana wakhutjwa lilitje waratlaka phasi ngendlela ebuhlungu. Ingwenya emthandako leyo, beyimlandela, yayokujama hlanu kwakhe yambukela. Njengombana irharhabela hlanu kwakhe, uSefako wathukwa waba makhaza.
Ingwenya yathi kuye ngesineke, “Ungasabi.” “Bengihlala ngikubukele nawulele ngaphasi komuthi loya mihle namalanga, kodwana azange ngikulimaze. Ngingathi ngikudlelani-ke nje?” Khonokho, ingwenya yathoma yacula ingoma emnandi eyatjhiriya ihliziyo kaSefako.
Angasenavalo, umntazana omuhle lo wasikima walalela iphimbo ebekahlala alizwa kangangobana naye wayithanda.
Ngemva kwalokho, uSefako bekagijimela ngemlanjeni ahlangabeze ingwenya qobe ntambama, begodu ngemva kwesikhathi, waqunta ukutjhada nayo.
Ngokukhamba kwesikhathi, waba nesibindi sokutjela uyise.
Uyise lakaSefako azange lithabe nakancani! “Kazi ingwenya yakho leyo inazo na iinkomo zokukulobola?” kubuza uyise asilingekile. “Izokukghona na ukukubelethisa abantwana beyikwakhele nekhaya?”
Ngitjho nanyana ubabakhe angazange akwamukele ukuthi atjhade nengwenya, uSefako yena bekasolo ayithanda. Lokha uyise nakalemuka bona indodakazakhe ayizokutjhugulula indlela ezizwa ngayo, wakhamba wayomlodlhelela ngakwenye ikumba yeplasini. Mihle namalanga emini, bekamlethela ukudla amhlole nokuthi unjani
Kodwana ngelinye ilanga, uyise walibala ukulodlhela umnyango wekumba. USefako walinda kancani ukuqiniseka bona bengekhe kuzwe muntu nakavula umnyango yeke wavula ngokurhabako wagijimela ngemlanjeni.
Wathi nakafika lapho, uSefako wabiza, "Ngwenya, Ngwenya, ngimi uSefako!" Ingwenya ebeyisolo imhlulukele amalanga amanengi, yakhuphuka ngaphasi kwamanzi yeza yazomlotjhisa.
Ngakusasa, ubaba kaSefako walemuka bona akekho, kwamsilinga khulu lokho! Ngelaka, wathatha umphini odege walandela umtlhala wendodakazakhe otjhinga ngemlanjeni. Bekazimisele ukuvimba indodakazakhe bona ingatjhadi nengwenya.
Wathi nakafika ngerharheni lomlambo, wabona uSefako aduda ngemlanjeni nengwenya hlanu kwakhe.
“Sefako, Sefako,” kubiza uyise. “Yewuzapha ngokurhabako! Angekhe utjhade nengwenya leyo.”
USefako wajika waqala ngakuyise wambabayisa ngaphambi kokududa bebayokutjhinga nengwenya. Uyise otshwenyekileko wabukela kunganalitho angalenza njengombana indodakazakhe itjhinga ngaphasi kwamanzi nengwenya.
Ngokukhamba kwesikhathi, uSefako wabuya wazokuvakatjha eplasini. UYise wathaba wabhembesa nakambonako. Bekamkhumbule kwamanikelela, begodu ngesikhatheso, bekazi bona yini okufuze ayenze.
“Ngiyanamukela, ngiyanamukela, nobabili,” kutjho uyise, agijimela ukuyokulotjhisa uSefako nengwenya. Bese waqala ingwenya wathi, "Siyakwamukela emndeninethu."
