UMulalo wayekwazi ukuthetha nezilwanyana. Wayeyiqonda into ethethwa sisilwanyana ngasinye KWAYE isilwanyana ngasinye sasikuqonda okuthethwa nguMulalo. 

Ngenye imini uthe esahamba-hamba endle, uMulalo wagqitha kwindlwane yeentaka eziphothayo nezaziwa ngokuba ziintakananja. 

“Khawusincede,” latsho ilizwi elincinane liphuma phakathi kwindlwane, “kukho inyoka apha ezama ukusitya.” 

UMulalo wakroba phakathi kwindlwane leyo kanti ngokwenene, kukho inyoka ezisonge phezu kweentaka ezintathu eziphothayo eziziintakananja. Umlomo wenyoka wawuvulekile seyiza kuzinkwamla. UMulalo wayitsalela phandle inyoka wayilahlela ngaphaya kwendlela. 

“Haaayi,” yakhwaza ikhala inyoka, ibhabha emoyeni yaza yawa phezu kwetyholo. 

“Siyabulela,” zatsho iintaka eziphothayo, “asisayi kuze sikulibale oku.” 

Phambilana endleleni uMulalo wagqitha kwindawana efukufuku nentsundu ngebala, ekwakuhlala kuyo inxagu eyayivunduza isiduli esikhulu seembovane. 

“Khawusincede,” kwatsho amakhulu ngamakhulu amazwi amancinane, “nantsi, apha inxagu izama ukuqhekeza isiduli sethu!” “Heyi,” watsho uMulalo, ebhambatha inxagu emqolo, “khawuziyeke ezi mbovane, uyalonakalisa ikhaya lazo.” 

“Kulungile,” yatsho inxagu , itakela ngaphaya kwesiduli, ibaleka ukuya kungena etyholweni. 

“Siyabulela,” zatsho zonke iimbovane kuMulalo, “asisayi kuze sikulibale oku.” 

UMulalo waqhubeka nokuhamba waze wafika emlanjeni. 

“Khawuncede,” latsho ilizwi enyeleni yomlambo. Wajonga uMulalo, waze wabona intlanzi ingqengqe esantini. 

“Khawundincede undibuyisele emanzini,” yatsho intlanzi, “isigebenga esikhohlakeleyo esidala sindishiye apha, kwaye andikwazi kuphefumla emhlabeni ongenamanzi.” 

UMulalo wayibuyisela emanzini intlanzi. DYUMPU! 

“Ndiyabulela,” yatsho intlanzi, itshikizisa amaphiko ayo, “andisayi kuze ndikulibale oku.” 

UMulalo wahamba endleleni egudle umlambo. Wayengekahambi kakhulu ngethuba esiva ezi zandi: BHUM! WALAKAHLA! GADLA! Isigebenga sasingqisha ematyholweni! Emva koko uMulalo wasibona sihlala phantsi esiphakathini sendlela – DUDLU! Isigebenga sasisikhulu kangangokuba uMulalo wayesazi ukuba akanakukwazi ukudlula kuso. 

“Molo,” watsho uMulalo, “unganceda usuke?” 

“Ingaba unayo imali?” sabuza isigebenga. 

“Hayi,” watsho uMulalo. 

“Hayi ke, andisuki apha kude kubekho into endiyifumana kuwe,” satsho isigebenga. “Mhlawumbi unganayo into onokundihlekisa ngayo. Xa unokundixelela isiqhulo esihlekisa ngenene, ndakukuvumela ukuba udlule” Ngoko ke uMulalo waxelela isigebenga isiqhulo. Sasimalunga nenkawu kunye nendlulamthi, kodwa sasingahlekisi kakhulu ngoko ke isigebenga zange sihleke. 

“Kuza kufuneka ube nenye into oyenzayo,” satsho isigebenga. “Makhe ndicinge. Uyawubona laa mthi webhowabhi uphaya?” Wanqwala intloko uMulalo. 

“Ndiphathele umdumba kumphezulu wala mbhowabhi,” satsho isigebenga, “ukuze ndicinge ngokukuvumela udlule.” 

UMulalo wazama ukukhwela emthini, kodwa isiqu somthi sasimtyibilizi kakhulu waze akakwazi ukugwencela kuwo. Ngephanyazo kwadlula into ebhabhayo phezu kwentloko yakhe. 

“Singanceda,” zatsho iintaka ezincinane eziphothayo awayedibene nazo. Iintaka eziphothayo ngamachule okwenza izinto. Zaqokelela ingca neengcongolo zaphotha intambo ende. Zarhintyela intambo ngaphezu kwaloo mthi mde. 

“Ndiyabulela,” watsho uMulalo, waze wakhwela ngokusebenzisa intambo, wawufumana umdumba wombhowabhi phezulu emthini. 

“Akulunganga oku,” satsho isigebenga, sithatha umdumba. “Unamaqhinga.” 

“Ndincedwe ngabahlobo bam,” watsho uMulalo. “Asingomaqhinga lawo. Ndingadlula ngoku?” 

“Hayi, akunjalo,” satsho isigebenga. “Ibilula kakhulu ke leyo. Mandikuxelele into. Uyayibona laa ndawo inengca phaya?” wanqwala intloko uMulalo. Isigebenga saza sakhupha ingxowa eneembotyi sazisasaza kuyo yonke indawo enengca. “Chola-chola zonke iimbotyi zam phambi kokuba ndifike kumashumi amabini ngokubala, ukuze ndikuvumele udlule,” satsho isigebenga sihleka. “Makhe sibone abahlobo bakho bekunceda ke ngoku.” 

UMulalo waya kwindawo enengca waze waqalisa ukuchola-chola iimbotyi zesigebenga. 

“Singanceda,” atsho amakhulu ngamakhulu amazwi ephuma engceni. UMulalo wajonga phantsi waze wabona inyambalala yeembovane. 

“Ndiyabulela,” watsho, encumile. Ngoncedo lweembovane, uMulalo waziqokelela zonke iimbotyi phambi kokuba isigebenga sifike nakwishumi elinesibini ngokubala! Wasinika isigebenga iimbotyi ezo. 

“Kungani zikuncedile iintaka eziphothayo neembovane?” sabuza isigebenga, sikhangeleka sidideke ngokwenene. 

“Kungenxa yokuba ngabahlobo bam, kaloku benza njalo abahlobo – bayancedana,” watsho uMulalo. 

“Ndiyakuva, nalu uvavanyo lokugqibela,” satsho isigebenga. Sachola ilitye elibomvu saliphosa kweyona ndawo inzulu emlanjeni. “Lilande,” satsho, sihleka. 

UMulalo wajonga ezantsi emlanjeni. Wabona kulenyeza umbala osilivere yaza intlanzi yakhupha intloko yayo ngaphezu kwamanzi. Emlonyeni kuyo, yayimumathe ilitye elibomvu. 

“Ndiyabulela,” watsho uMulalo. Wanikezela ngelitye elibomvu esigebengeni. 

Isigebenga sasuka salila. “Akwaba nam izilwanyana bezindinceda ngendlela ezikunceda ngayo wena,” satsho isigebenga. “Ndikhohlakele ngoko ke akukho nomnye umntu okhe avume nto xa ndimcela. Mhlawumbi kufuneka ndizame ukuba njengawe.” 

UMulalo wasanga saze isigebenga sahamba sabuyela etyholweni. Ukususela ngaloo mini, isigebenga sayeka ukukhohlakala kuba nangona sasingakwazi ukuthetha nezilwanyana njengoMulalo, saba ngumhlobo wazo zonke futhi sizinceda nanini na xa kukho imfuneko.