Mesong ye letšatši le be le phadima kudu ge Lulu a dutše godimo ga kalana ya bjang lepatlelong la dipapadi la sekolong sa bona. Lehono ke letšatši la dipapadi Sekolong sa Phoraemari sa Dikhunkhwane. Lulu o thabile kudu. O kgatha tema papading ya go tshelela godimo. “Matsetse a kgona go tshelela godimo kudu!” a goeletša bjalo ge a tshelela godimo ga leswika, lekalana le godimo ga lekala la mohlare wa kgauswi le moo. Lulu o ile a lebelela fase a le mohlareng gomme a bona dikhunkhwane tše dingwe di itokišetša ditiragalo tša letšatši. Dikhunkhwane ka moka di be di itshepa ka gobane di be di dutše di itlwaetša ka thata go itokišeletša letšatši le.

Tšie e be e otlolla maoto a yona a morago. “Maoto a ka a tiile kudu. Ke nagana gore lehono ke tlo šoma gabotse papading ye ya go tshelela godimo,” gwa realo Tšie. “Ke nagana gore ke tlo thopa lebelo le,” gwa realo lephene ge le dutše le eja lerathana la mafelelo la sephaphatha gomme le iphumola molomo ka lefego. Leponono, Monang, Nosi le Ntšhi di be di phuphusetša mafofa a tšona ge di dutše di ngangišana ka gore ke mang gare ga tšona a kgonago go fofela godimodimo. “Go fofela godimodimo ke tiragalo ya go ikgetha,” gwa realo Leponono. “Ga se dikhunkhwane ka moka di nago le maphego, eupša rena bao re nago le wona, re kgona go fofela godimodimo.

Ke nagana gore sefoka se se re nna wee.” Kgobaboloko e be e tseba gore e be e tla kgona go kgokološetša kgwele ya boloko kgolekgole ka baka la maoto a yona a go kgwahla. Tšhošwane e be e tseba gore sehlopha sa yona se tla thopa lebelo la go neeletšana ka gobane di be di dutše di itlwaetša go neeletšana mahlokwana ka dikgwedikgwedi. Ke moka Serurubele se be se tseba gore se tla fofa go phatša mapheko ka moka papading ya go feta gare ga mapheko a mehutahuta. Lulu le yena o be a itshepa. “Lehono ke tlo tshelela godimo go ba feta,” gwa realo Lulu. “Zara o nagana gore a ka mphala, eupša ke nna a tlo thopago sefoka!” Ge Lulu a fetša go bolela bjalo, a tshelela godimodimo lekaleng la mohlare gomme a wela … godimo ga selo se sengwe sa boyana. “Ke wetše kae?” gwa realo Lulu a lla ka kgakanego. Ka ge Lulu a be a lora a dutše a butše mahlo, ga se a bona ge Tšhwene e be e namela mohlare woo. Gona bjale Lulu o kgakgetšwe ka gare ga boya bja Tšhwene!

Ke moka Lulu o ile a kwa Mohumagatšana Podilekgwana a re, “Bosele, bosele. Re amogela baraloki ba rena ka moka, malapa a bona le babogedi ka moka! Itokišeng ka gobane re kgauswi le go thoma. Re kgopela baraloki ka moka ba kgobokane gare ga lepatlelo.” Lulu o be a kgona go kwa babogedi ba go dira lešata ba sega, ba opa magoswi e bile ba phuphusela. Seo Lulu le lešaba ka moka ba bego ba sa se tsebe ke gore go be go na le digwagwa tše di utamego ka fase ga matlakala a mohlare ao a wetšego fase. Digwagwa tšeo di be di letetše nako e botse ya go tšwa kamoo fase ga matlakala gomme di thome go ja dikhunkhwane tšeo ka moka tše dibose!

Ka yona nako yeo, Lulu o be a leka go tšwa ka gare ga boya bja Tšhwene, eupša go be go bonala a sobelela le go feta. Ke moka o ile a hlaba mokgoši ka mokgo a ka kgonago, a re, “Thušang! Thušang! Ke kgopela le nthušeng hle!” Eupša ga go na yo a ilego a kwa lentšuana la gagwe ka ge dikhunkhwane di be di hlabile lešata.

Ke moka Lulu o ile a kwa Mohumagatšana Podilekgwana a re, “Papadi ya banenyana ya go tshelela godimo e tla thoma e se kgale. Ke kgopela gore bohle bao ba nyakago go tšea karolo ba ye lefelong la papadi ye.” “Aowii hle,” gwa realo Lulu a goeletša. “Ke tlo fetwa ke papadi ye!” O ile a leka go tšwa ka gare ga boya bja Tšhwene, eupša boya bjoo e be e le bjo bontši kudu. Lulu o ile a thoma go lla.

O be a itlwaeditše ka thata gore a tle a raloke letšatšing le, eupša gabjale o be a tlo palelwa go tsenela phadišano. Ka moragonyana, Lulu o ile a kwa Mohumagatšana Podilekgwana a re, “Papadi ya banenyana ya go tshelela godimo e sepela gabotse. Le ke lekga la mafelelo la gore Zara a raloke. Kota ye a swanetšego go e tshela e godimodimo. A re boneng ge e ba a tla kgona go e tshela.” Ke ka yona nako yeo moo Lulu a ilego a gopola mantšu a mmagwe a gore, “Lulu, le ge dilo di bonala di padile, o sa dutše o ka loga leano.” Ka gona Lulu o ile a tla ka leano le lebotse kudu. O ile a ipotša a re, “Ke nna letsetse. Ke a loma. Ge ke lomile selo, se šala se hlohlonelwa.” Se ke sona seo Lulu a ilego a se dira – o ile a loma Tšhwene gantši ka mokgo a ka kgonago.

“Hooooooo!” gwa realo Tšhwene e goeletša. “Go na le selo seo se ntomilego! Ke a hlohlonelwa.” Tšhwene e ile ya ingwaya ka maatla moo e ilego ya ntšhetša Lulu ka ntle ga boya bja yona, gomme Lulu a akalala lefaufaung a fofa. “Wheeeee!” gwa realo Lulu a goeletša ge a dutše a fofa ka godimo ga kota yela ya papadi ya go tshelela godimo! Zara ga sa nka a kgolwa mahlo a gagwe. O ile a botšiša a maketše gore, “Lulu, o tšwa kae?” Le pele Lulu a ka araba, Tšhwene e ile ya thedimoga mohlareng gomme ya wela fase. E ile ya wela godimo ga digwagwa tšeo di ilego tša tšhoga kudu gomme tša ja fase. Diboba di be di fofa ka godimo ga dikhunkhwane tše dingwe ka moka go di šireletša gore di se jewe. Ke moka di ile tša rakediša digwagwa tšeo ka moka. Ka baka la tlhakatlhakano yeo, bohle ba be ba nagana gore Lulu ke yena a fentšego papading ya go tshelela godimo, eupša Lulu o ile a ba phošolla a re, “Aowa, ga se ka tshelela godimo. Tšhwene ke yona e dirilego gore ke fofele ka godimo ga kota ye. Zara ke yena a fentšego papading ye.”

Mohumagatšana Podilekgwana o ile a nea Zara mogopo wa phenyo, ke moka a re, “Re a go lebogiša Zara, re ikgantšha ka wena.” Ke moka a retologela go Lulu a re, “Re ikgantšha kudu ka wena Lulu. O ile wa tshepagala gomme wa dira gore Zara e be yena a amogelago mogopo. E bile o re phološitše go digwagwa tšela tša go šišimiša!

Ke nagana gore le wena o swanelwa ke go amogela mogopo.” Ke moka o ile a nea Lulu mogopo wa go tshepagala le go bontšha sebete. Bohle ba ile ba opa matsogo, gomme Zara a gokarela Lulu ka lerato. Mafelelong a letšatši, dikhunkhwane ka moka di ile tša dumelelana gore tiragalo ye ya dipapadi e bile tiragalo ya go di phala ka moka yeo di kilego tša ba go yona!

Dira gore kanegelo e be le bophelo!

• Ngwala maina a dikhunkhwane ka moka tša kanegelong. (GO GO THUŠA: Ke dikhunkhwane tše 12.)
•  Terowa khunkhwane ye o e ratago gomme o ngwale gore RATA ka fase ga yona
•  Gape terowa khunkhwane ye o sa e ratego gomme o ngwale gore HLOILE ka fase ga yona. 
•   Kgetha khunkhwane efe goba efe. Šomiša letsopa, Prestik goba hlama ya go ralokiša go bopa khunkhwane yeo