Go na le naga ye nngwe kua kgole, kua kgole kudu ya go bitšwa China. Kgale, gona kua nageng ya kgole go be go dula mošemane yo mongwe a bitšwa Ho. Ho o be a hloka, efela a lokile kudu. O be a šoma kudu gore a hwetše tšhelete ye e tla lekanago go reka dijo.

Le ge Ho a be a hloka, o be a thuša batho ba bangwe ka mo a kgonago ka gona. Ho o be a rata gape le go penta gomme a penta ge a hweditše nako.

Bošego bjo bongwe, o lorile mokgalabje a mo fa poraše ya go penta ya mehlolo.

“O na le pelo ya go loka,” a realo mokgalabje torong ya gagwe. “Ke a bona gore o rata go penta. Poraše ya go penta ya mehlolo ke ye. Ke nyaka o ntshepiše gore o tla e diriša go thuša batho.”

Ge Ho a tsoga, o hweditše poraše ya go penta ya mehlolo kgauswi le yena.

“Aa,” a realo, “Ke be ke nagana gore ke toro fela.”

Go tloga letšatšing leo, ge batho ba nyaka thušo ka mehla o be a diriša poraše ya go penta ya mehlolo.

“Ho,” gwa goeletša batho bao ba bego ba le mašemong. “Ga go na meetse ka sedibeng. Re nyaka go nošetša dibjalo tša rena.”

Ka fao, Ho o ile a ba pentela noka. Ge a dutše a penta, noka e ile ya ba gona ka mohlolo gomme batho ba kgona go nošetša dibjalo tša bona.

Ka morago Ho o ile a bona gore batho ba katanela go lema mašemo, ka fao a penta kgomo le mogoma gore di ba thuše. Nako le nako ge a bona gore motho a hloka thušo, o be a diriša poraše ya gagwe ya go penta. Batho ba bantši ba ile ba tseba ka lebelo ka ga Ho le poraše ya gagwe ya go penta ya mehlolo.

Ka morago ga fao, monna wa mohumi o ile a kwa ka ga poraše ya go penta. “Poraše yeo ya go penta e tlo ba yaka,” a realo ebile a beakanya gore o tla e utswa bjang. “Ke tla dira tšhelete ye ntši ka ba monna wa mohumihumi nageng ka bophara.” Ka letšatši la go latela o ile a roma batho gore ba late Ho.

“Lehono ke nyaka gore o hlokomele dikgomo tšaka,” a realo. “Ke tla go lefa gabotse mathapama a.”

Ho o be a thabile gomme a hlokomela dikgomo tša monna wa mohumi. Efela mathapama go na le gore a lefiwe, o ile a lahlelwa kgolegong gomme a tšeelwa poraše ya go penta ya mehlolo.

“O utswitše yenngwe ya dikgomo tšaka,” monna wa mohumi a realo a bolela maaka. “Poraše ye e tla lefela molato wa gagwe.” Mafelelong, a nagana, poraše ya go penta ya mehlolo ke ya ka.

Monna wa mohumi o laleditše bagwera ba gagwe ka moka go tla ngwakong wa gagwe. “Dulang fase le bone se,” a realo. O ile a penta diswantšho tše dintši ka poraše ya go penta ya mehlolo. Ka moka ga bona ba ile ba letela, ba letela …. ba letela, efela ga go seswantšho le se tee se ilego sa phela.

“Go direga eng?” gwa goeletša monna wa mohumi. “Sepelang le ye go tšea Ho le mo tliše mo!”

Ho o ile a tlišwa go monna wa mohumi. Efela bjale Ho o be a tseba gore monna yo o a inaganela ebile o sehlogo.

“Ge o ka mpentela diswantšho tše mmalwa,” a realo monna wa mohumi, “tša phela, ke tla go lefa ka ba ka go lokolla.”

Mathomong Ho ga se a tsebe gore a dire eng. Gomme, o ile a tlelwa ke kgopolo. “Ee, nka dira seo,” a realo Ho.

“Selo sa mathomo se ke nyakago o se penta ke thaba ya go dirwa ka gauta ye KGOLO,” a realo monna wa mohumi. “Ke nyaka go kgoboketša gauta ka moka ga yona.”

Ho o ile a tšea poraše ya go penta ya mehlolo a penta lewatle. Se se ile sa befediša monna wa mohumi.

“Ke ka lebaka la eng o pentile lewatle? Ga ke nyake lewatle. Ke nyaka thaba ya go dirwa ka gauta. Bjale, e pente ka potlako.”

Ho o ile a penta thaba ya go dirwa ka gauta ka mošola wa lewatle. “O tla swanela ke go tshela lewatle go ya go yona,” a realo.

“Bjalo penta sekepe se segolo ka potlako se ke tla tshelago lewatle ka sona,” a realo monna wa mohumi.

Ho a myemyela a penta sekepe se segolo. Pele a fetša ke ge monna wa mohumi a fofela ka sekepeng. Ba lapa la gagwe le bagwera ka potlako ba ile ba fofela ka sekepeng gomme ba sepela.

Ho o ba lebeletše ka tlhokomelo. O eme go fihla sekepe se fihla gare ga lewatle, gomme a penta lephoto le legolo. Lephoto le ile la kitimela thoko ya sekepe. Ge le batametše – PHUU! – la khupetša sekepe gomme la se ntšha ka diripa tše sekete.

Morago ga seo, Ho o ile a phela a thabile. O be a na le dijo tše dintši. O be a thušitše batho ge ba hloka thušo, gomme a penta diswantšho tše dintši ka mo a nyakago.

Ka nako ye nngwe o be a lebelela thaba ya go dirwa ka gauta go selaganya lewatle. Ga go motho le o tee yo a kilego a ya fao ka ge go be go se selo ntle le gauta fela. Gabotsebotse … ga go selo ntle le gauta, diripa tša sekepe le monna wa mohumi wa go befelwa kudu, lapa la gagwe le bagwera ba gagwe.