Mma o lahletše mekotla ya gagwe ya direkwa lebatong a ya a dula setulong sa ka moraleng. “Ijoo, efela ke lapile,” a realo a phumula sethitho phatleng. “Ka mo ke swanetše go pakela teye ya letšatši la matswalo la Moruti Dumisani kua kerekeng mathapameng a lehono.”

“O dira dipanekuku, Mma?” a realo Unathi ka lethabo. “Nka go thuša.”

“Aowa,” a realo Mma. “Ye ke teye ya letšatši la matswalo la go kgethega la Moruti Dumisani. Baruti ka moka ba kereke ya rena ba etla, le mogwera yo mogolo wa Moruti Dumisani, e lego Moruti Buso. Ke kwele gore Moruti Buso o rata disekontshe tša tšhese, ka fao ke rekile motswako wa disekontshe go di dira. Moruti Dumisani o rata dipisikiti tša swikiri, ka fao ke rekile motswako wa dipisikiti go di dira.”

Unathi o be a lebelelega a nyamile, “Ke nagana gore o dire dipanekuku, Mma. Bohle ba a di rata. Ka fao ge o ka dira tšona ke tla go thuša.”

“Aowa, ke a leboga, Unathi,” a realo Mma. “Ke rata gore bohle ba bone gore ke paka botse. Ke paka disekontshe le dipisikiti gomme ke itlhaganetše. Ke swanetše go dira tšeo nna mong.” Mma a thoma go pakolla motswako wa disekontshe le motswako wa dipisikiti a ntšha potoro le dikotlelo.

Unathi o ile a bogela Mmagwe a ntšha ye nngwe ya diphakhethe a e tšhela ka sekotlelong. O lahletše dikwere tše dinnyane tša potoro ka motswakong a di hlakanya ka dintlha tša menwana ya gagwe. “Ke disekontshe goba dipisikiti tšeo Mma?” Unathi a botšiša.

“Disekontshe,” Mma a realo a tsenya tšhese motswakong a e huduga.

Unathi o ile a lebelela phakhethe ya go hloka selo yeo e lego tafoleng. Ka pele ga yona e na le seswantšho sa dipisikiti tša go kgahliša.

“Mma, o na le nnete ya gore o swere phakhethe ya maleba?” Unathi a botšiša.

Mma a lebelela a le gare a tšhela maswi ka komiking ya go ela. “Unathi, o tla ntshwarela,” a realo ka pefelo, “efela ke go boditše gore ke itlhaganetše. Ke kgopela gore o sepele o ye go bapala.”

“Efela …” Unathi a thoma.

“Sepela,” a realo Mma a tiišitše.

Unathi o kwele e ke o nyaka go lla. O be a leka go thuša. O kare Mma ga se a dira gabotse ge a be a leka go kgahliša batho ba bangwe.

Unathi o ile a ya go dula mohlareng o mogolo ka tšhemong. O ile a bogela Mma ka lefesetere la morale.

Mma o rile go fetša go phatlalatša le go ripa tege ya mafelelo, a phumula diatla lešeleng a lebelela ka lefesetere. O bone Unathi a dutše mohlareng gomme a mo oba ka seatla gore a boye. Unathi o be a thabile. Mo gongwe Mma o be a sa hlwe a befetšwe gomme o tla mo dumelela gore a latswe dikotlelo.

Mma o ile a myemyela ge Unathi a tsena ka moraleng. “Ke feditše go paka. O ntshwarele ge ke be ke befetšwe, efela ke be ke na le mošomo o montši. Ke go šietše tege ya dipisikiti ya go lekana lehwana gore o kwe tatso,” a realo Mma.

Unathi a myemyela a lokela tege ya dipisikiti ka molomong wa gagwe. O ile a tswalela mahlo ge a emetše gore bobose bo fihle go dikwi tša tatso.

“Akgg, phoo!” a realo Unathi, a tshwela bolo ya tege ka diatleng. “Dipisikiti tše tša botse ga di bose. Ga ke di rate le gateetee.”

Mma a makala, “O ra bjang, Unathi? O a kgowa.”

“O ntshwarele Mma, efela o swanetše go di kwa,” a realo Unathi. “Ga di bose le gatee.”

Mma o ile a ngwatha seripa sa tege a se lokela ka molomong. Nko ya gagwe ya šošobana ka go tenega. “Ga di bose,” a realo. “E ka ba go senyegile kae?” Ka pejana, a bea diatla sefahlegong. “Aowa, hle!” a belaela. “Ke hlakantše motswako wa disekontshe le motswako wa dipisikiti! Ke dirile disekontshe tša swikiri ye ntši kudu le dipisikiti tša swikiri tša go ba le tšhese!”

Mma o ile a dula tafoleng a tsenya hlogo ka diatleng. “Ke ile go dira bjang bjalo? Ga ke sa na motswako o mongwe wa disekontshe goba wa dipisikiti, gape ga go sa na nako. Ke ile go dira eng ka teye ya letšatši la matswalo la Moruti Dumisani?”

Unathi a tlelwa ke kgopolo ya botse ka pejana. “Go na le nako ye e lekanego ya go dira dipanekuku, Mma! Re hloka fela folouru, mae, oli le maswi. Tšeo re dula re na le tšona. GOMME, nka go thuša!”

Mma o ile a gokara Unathi. “O bolela nnete. Nkabe ke go theeleditše go tloga mathomong. Dipanekuku di tla loka.”

Mma le Unathi ba ile ba thoma go šoma. Ba dirile mokgobo wa dipanekuku o mogolo. Unathi o jele tše hlano ge a le gare a thuša!

Mosegare woo teye ya letšatši la matswalo e bile katlego ye kgolo ebile le baruti ba babedi ba ratile dipanekuku!