Written stories
USOKULUNGA YIPILO
Pilo wang'fundis' ukukhasa
Nakumadolo nezembatho zadliwa makhaza
Wang'fundis' ukujama
Ngakghona ukufinyelela izinto ezikude nami
Kodwana khenge zingise ndawo
Wang'fundis' ukukhamba ngeenyawo
Ngingazi bona ngilicalisephi
Nakuyindlela ungikhombisile
Ngakhamba la umunwakho ukhombe khona
Amakhaza, umoya, ukutjhisa, ithuli, is'nanja
Zoke zaphelela phezu kwami.
Lokha nangicabanga ukuguqa
Ngicalis' amehlwami kuSokulunga
Naka amanyeva angicalile.
Njenge komo, umutja waphelela phez' kwami
Njenge s'valo, ngabon' okukhulu
Nangikhulumako kuthiwa nginamala
Ngiqothwa nangekumbeni yokufundela
Ngingazi bona ngonephi
Nakusigidi ngasibona ngewami amabili
Njenge phepha, ngangiswa phas'phezulu
Nakuyisindiso, ngingafuni nokuyibona
Ngokuthloga ilwazi
Ngafikelwa yintambo, mumukhwa, mapilisi emkhumbulwenami
Ngacabanga bona:
Nakukukhamba ngikhambile
Nakuziintjhijilo ngizibonile
Nakuziinyembezi ngizithintele
Kodwana naku ngisaphelele
USomnini
Ubile ziinyathelo zami lokha nangikhamba emanyeveni
Wangiphuthela lokha nakunezulu, umoya, ithuli, amakhaza, ukutjhisa nes'nanja
Wangiduduza lokha nangicabanga ukuzisusa
Ngaye ilwazi ngilifumene
Mbala ukukhanya kwami kukuye
Ukuzithoba kwami kukuye
Ungumthombo ongomiko
Uyisisekelo nesindiso yami
Wazi ingaphakathi nengaphandle lami
Amehlwami ayohlezi acale kuye.