Kgale lesogana leo le bego le bitšwa Thukile le be le dula le mmago lona ka ngwakong wo monnyane. Ba be ba hlaka kudu gomme mmagwe a tsenya tšhelete ka go rekiša mae a bego a bewa ke kgogo ya gagwe.

Thukile o be a tšwafa ebile a sa dire selo. Ka selemo o be a sekama moriting gomme marega a dulela mollo.

Mesong ya Mošupologo o mongwe, mmago Thukile o be a befetšwe a re, “Thukile, ge o sa ye go šoma gore o kgone go ithekela dijo, ke tla go koba ka mo ngwakong sa ruri.”

“Ke swanetše go dira se sengwe,” Thukile a realo. “Bjale mma o kwagala a befetšwe kudu.”

Ka Labobedi, Thukile o ile a kgopela mošomo go rapolase wa ka moše wa noka. Rapolase o kgopetše Thukile go lokiša legora la gagwe gomme a mo lefa ka dikhoine tša silibera tše mmalwa. Thukile o ile a fofišetša dikhoine godimo le fase gore a kgone go bona go phadima ga tšona letšatšing. Efela o ile a timetša dikhoine tšela ka moka pele a tshela noka.

“Aa mošemane wa setlaela,” a realo mmagwe, “nkabe o di tsenye ka potleng.”

“Eya,” a realo Thukile, “ka moso ke tla dira bjalo.”

Ka Laboraro, Thukile o ile a kgopela rapolase yo mongwe, “Naa nka go thuša ka dikgomo tša gago?”

“Ee,” a realo rapolase, “ke tla go lefa ka jeke ya maswi.”

Mafelelong a letšatši, rapolasa o file Thukile jeke ya maswi. Thukile o ile a e tsenya ka potleng ya jase go latela se boletšwego ke mmagwe. Tsorr! Tsorr! Tsorr! Maswi a ile a tšhologa gomme a fihla gae le jeke e se sa na selo.

“Thukile, moratiwa!” a realo mmagwe. “O be o swanetše go rwala jeke hlogong ya gago.”

“Go lokile,” a realo Thukile, “ka moso ke tla dira bjalo.”

Ka Labone, Thukile o ile a šomela mosadi wa go dira yokate. O ile a leboga Thukile ka yokate. E be e le ka setšhelong sa polastiki sa go bulega sa go phuthelwa ka lešela. Thukile o ile a rwala setšhelo hlogong bjalo ka ge mmagwe a mo laetše. Efela ge a fihla gae go be go šetše yokate ye nnyane ka setšhelong.

“Aa mošemane wa setlaela,” a realo mmagwe, “o be o swanetše go se swara ka diatla.”

“Eya!” a realo Thukile. “Ka moso ke tla dira bjalo.”

Ka Labohlano, Thukile o ile a šoma lepakeng. Monglepaka o ile a leboga Thukile ka go mo fa mpša. Thukile o ile a kuka mpša ka diatla tša gagwe gabotse a ya le yona gae. Go se go ye kae, mpša e ile ya thoma go ngwapa le go loma Thukile gampe ka moo a ilego a swanelwa ke go e tlogela.

Mmagwe o ile a re, “Ijoo, Thukile, nkabe o e bofe ka thapo molaleng gomme e go šale morago.”

“Go lokile,” a realo Thukile, “gosasa ke tla dira bjalo.”

Letšatši la go latela e be e le Mokibelo gomme Thukile o ile a ya go šomela raleselaga. O ile a lefa Thukile ka seripa sa nama ye botse. Thukile o tšere nama, a e bofa ka thapo a e gogobiša ka morago ga gagwe! Ge a fihla gae nama e be e senyegile.

“Ke ile go dira eng ka wena?” mmagwe a botšiša. “Gosasa ke Sontaga, gomme sejo se re tlago lalela ka sona ke khabetšhe fela. O be o swanetše go atha nama magetleng a gago.”

“Ka moso ke tla dira bjalo,” gwa fetola Thukile.

Ka Mošupologo, Thukile o šometše motho yo a ilego a mo leboga ka tonki. Thukile o ile a katana-katana, efela mafelelong a kgona go atha tonki magetleng a gagwe. O ile a ya gae a sepela ka go nanya.

Thukile o ile a feta ntlong ya monna wa mohumuhumi. Monna wa mohumi o be a na le morwedi o tee fela, efela ke mengwagangwaga a sa kgone go bolela. Gape ga se a ka a sega bophelong bja gagwe. Dingaka di rile o tla kgona go bolela gape ge feela a ka segišwa ke motho yo mongwe. Monna wa mohumi o ile a tshepiša gore motho yo a ka mo dirago gore a sege o tla mo nyala.

Mosetsana o be a lebeletše ka lefasetere ge Thukile a be a feta a athile tonki magetleng. Maoto a tonki a be a akaletše moyeng gomme a be a segiša ka mo e lego gore mosetsana yo o ile a iphetša ka disego. A napa a kgona go bolela gape ka bonako.

Monna wa mohumi o be a thabile kudu, gomme a phethagatša tshepišo ya gagwe – morwedi wa gagwe le Thukile ba ka nyalana. Thukile o ile a huma. O ile a dula ka ngwakong o mogolo le mosadi wa gagwe le mmagwe yo a ilego a tlogela go šoma. Le Thukile ga se a ka a hlwa a sa ithwalela eng goba eng gape.