“Hee, ke nako ya maikhutšo!” gwa opela Hope. Mmagwe o ile a sega a emiša koloi polaseng ya Mme wa Afrika.

“Re fihlile!” gwa goeletša Josh ge a bona Afrika le mmagwe.

“Bjale ka gore le fihlile, le beakantše go dira eng?” gwa botšiša Mme wa Afrika morago ga gore bohle ba fetše go pakolla mekotla ya bona.

“Lehono re tla fepa diphoofolo tša mo polaseng ra le topela le mae, Mme wa Afrika,” a realo Hope. “Gosasa ka moka ga rena re tla fofiša dikhaethe gomme ka letšatši la mafelelo, Josh a ka rata go ithuta go paka borotho ka ontong ya ka ntle.”

“Ke rata go bontšha Hope molete wa meetse,” a realo Afrika.

Mme wa Afrika le mmago Hope ba ile ba sega.

Matšatši a bona a mabedi a mathomo e bile a go swarega kudu a lethabo. Ka letšatši la boraro Hope o ile a ya moleteng wa meetse le Afrika, le ge e le gore yena o be a rata go paka borotho le Josh.

“Re tla boa ka nako ya dijo tša matena,” a realo Hope ge yena le Afrika ba laela bohle ba ba emišetša le diatla.

Ba ile ba bona dipekwa tše pedi tseleng, dihlaga tša dinonyana le legotlwana. Hope o ile a di tšea dinepe ka sellathekeng sa gagwe.

“Molete wa meetse o kua,” a realo Afrika a mo šupetša. “A re khute ka morago ga sekgwa se gomme re se dire lešata.”

Afrika le Hope ba ile ba bogela dinonyana di enwa ebile di hlapa ka meetseng. Go be go na le tshepe ye nnyane e nwa meetse mollwaneng wa meetse.

Ka nakwana, Hope a tonya. Go na le selo seo se bego se sepela ka sekgweng ka morago ga gagwe.

“Afrika!” a hebaheba.

“Nkane o hebaheba?” gwa botšiša Afrika, a sa lebeletše molete wa meetse.

“Go na le selo se sengwe ka morago ga rena gomme se a batamela,” Hope a hebaheba ka bjako.

“O se ke wa itira setlaela! Ga go na selo se kotsi mo,” a realo Afrika.

Efela ka morago o ile a retologa a lebelela. “Aowaowa!” a goeletša. “KITIMA! KITIMA!”

Ba kitima magareng ga mehlare ya meetlwa le go putla maswika. Afrika o ile a namela mohlare o motelele gomme Hope a mo latela. Ba be ba ekwa gore go na le selo seo se ba latelago.

“Ke eng?” Hope a botšiša a thuthumela ebile a lebeletše a le polokegong mohlareng.

“Ke kolobesodi. Gomme e befetšwe!” a realo Afrika.

“E kotsi?” gwa botšiša Hope.

“Lebelela manaka a yona. Ge e befetšwe e kotsi kudu!” a realo Afrika.

Kolobesodi e ile ya ba lebelela. Manaka a yona e be e le a magolo a go kgopama. E ile ya šutšela moyeng gomme ya dikologa mohlare e kgorotla. Ka morago e ile ya retologa ya kwatama ka dikhuru.

“Aowaaa,” Afrika a hemela godimo.

“Ke eng? Ke eng?” gwa botšiša Hope.

“E nyaka dijo bjale. A re eme re holofele gore e tlo sepela e se kgale,” a realo Afrika.

Bana ba ile ba lebelela kolobesodi e fata mo fase. E ile ya sobelela ka sekgweng ka morago ga sebaka.

“Okare re dutše diiriiri fa. O na le nnete ya gore e sepetše?” gwa botšiša Hope.

“Ke na le nnete. Etla,” a realo Afrika a fologa mohlare, a lebelela ka mathoko gomme a ngunguna.

“Bothata ke eng? E a boa?” Hope a botšiša ka letšhogo.

“Aowa,” a realo Afrika. “Ke go feta seo.”

“Ke eng sa go feta go kitimišwa ke kolobesodi ya go befelwa?” gwa botšiša Hope.

“Re timetše,” a realo Afrika. “Ga se ke lebelele fao re bego re tšhabela gona … gomme … o tla swanelwa ke go founela mma.”

Hope o ile a lebelela sellathekeng ka morabeng wa gagwe. “Ga se gona,” a realo. “Se swanetše se wele ka nako ye re be re kitima. Bjalo? Re a latelwa. Ijoo, okare nkabe ke šetše gae ka paka borotho le Josh!”

Afrika o ile a hemela godimo. “Re tla swanelwa ke go lebelela mehlala ya maoto a rena. Ge re ka e hwetša, re tla e latela go ya moleteng wa meetse.” O ile a thoma go lebelela gohle. “Aowaowa! Re be re kitima mmung wa go tia ka fao go ka se be le mehlala ya maoto!” a realo.

“Re tla no dikologa go fihlela re hwetša se sengwe,” a realo Hope gomme a thoma go sepela. “Ke o!” a goeletša. “Mohlala ke o.”

Afrika o ile a lebelela mehlala. “Aowa,” a realo, “ga se mehlala ya maoto a rena yeo. Tšwela pele ka go sepela.”

“Efela Afrika, e ka thuša. Ke nagana gore ke mehlala ya tshepe yeo. O sa gopola? Re bone tshepe ye nnyane moleteng wa meetse.”

“Ee!” a realo Afrika. “Re ka e latela go boela moleteng wa meetse. Re swanetše go sepediša ka gobane ke dumela gore batho bohle kua gae ba thoma go belaela gore re kae.”

Ba be ba sa holofela go hwetša Mme wa Afrika le mmago Hope moleteng wa meetse!

“Le latetšwe gannyane,” a realo Mme wa Afrika a fologa koloi. “Re be re tshwenyegile. Namelang re sepele.”

“Ke holofela gore lena ba babedi le na le kanegelo ye botse,” a realo mmago Hope, a dumiša koloi. “Le swanetše go hlaloša tšohle.”

Hope le Afrika ba ile ba lebelelana.

“Fale,” a realo Mme wa Afrika, “Ke fetša go bona kolobesodi ya go befelwa. Ka mahlatse ga se la kopana le yona. Go be go tla ba kotsi kudu!” Ka moragonyana o ile a re, “Ijoo, Hope, bona gore ke hweditše eng moleteng wa meetse kua kgauswi le sekgwa.” O ile a fa Hope sellathekeng sa gagwe. “Ka madimabe se be se se ka morabeng wa gago, nkabe o re leleditše mogala wa re tsebiša gore le tla latelwa.”

Hope o ile a lebelela Afrika gape gomme bobedi bja sega.

“Mmm,” a realo Mme wa Afrika. “Le bonala le na le kanegelo ye botse ya maikhutšo yeo le ka e anegago, Hope.”

E ba le boitlhamelo!

Hlohleletša bana ba gago go ngwala goba go anega dikanegelo tša bona tša bohlagahlaga bja maikhutšo – tša nnete goba tša boikgopolelo!