“Kanegelo, kanegelo, hle Koko, re anegele kanegelo,” gwa kgopela Neo. Bella a myemyela a be a dumela ka hlogo.

“Ee, hle,” a realo Afrika yo a bego a dutše diropeng tša Koko.

Koko o ile a sega. “Go lokile,” a realo, “e re ke le anegele kanegelo ya ka moo le bilego bagwera. Naa le a tseba gore tšohle di thomile ka mpšanyana?”

Neo a dumela ka hlogo. Bella a myemyela a re, “Re botše, re botše.” Ya ba Koko o thoma go anega kanegelo.

Bošego bjo bongwe, ga se kgale, mpšanyana e be e sepela e tšama e dupa motomo wa matlakala wo mongwe le wo mongwe wo e kopanago le ona. E be e swerwe ke tlala ebile e timetše. E be e sa tsebe fao e yago, efela e be e tseba gore e swerwe ke tlala gape e nyaka dijo!

“Ijoo mpšanyana ya batho,” a realo Afrika.

Efela kgauswi le motomo wa matlakala go be go se na dijo. Mpšanyana e ile ya llela tlase. E be e swerwe ke tlala gape e nyaka lefelo la borutho gore e robale. E ile ya sepela mmileng. Go be go na le mengwako ye mentši efela go ye mengwe go na le dimpša tša go e goba ebile di e ntšhetša meno. E be e tšhogile kudu.

Mafelelong a mmila, e ile ya bona ngwako o monnyane wa go se be le dimpša tše dikgolo. Mabone a be a timilwe ka gare ebile e lebelelega e le borutho e na le segwera, ka fao mpšanyana e ile ya ya go ona.

E rile ge e batamela, monkgo wa bose wa e fihlela dinkong. Lebati la ka pele le be le butšwe gomme e kgona go bona ka gare. E bone mosetsana yo a bala puku. O be a sega ge a lebeletše diswantšho.

“Ke nako ya dijo tša go lalela,” mpšanyana ya kwa lentšu le bonolo la segwera le goeletša. E be e lebeletše ge mmago mosetsana a bea di-noodles tafoleng. “Ke tla tšea poleiti yaka le moro. Hlapa diatla ka pela,” a realo mosadi a boela ka moraleng. Mosetsana o ile a kitimela ka ngwakong wa bohlapelo.

Mpšanyana e be e emetše sebaka se. E kitimetše ka gare, ya fofela setulong, ya tsenya sefahlego ka poleiting ya di-noodles tše borutho gomme ya di ja ka moka ga tšona. Ya ba e tšwa ka lebelo, ya tšwa ka lebati la go bulega, ya iphihla ka ntle.

“Efela Mma,” gwa goeletša mosetsana ge a dula tafoleng, “ga go na dijo ka poleiting ya ka.”

“ENG?” Mmagwe a kitimela ka phapošing. “Efela ke go soletše.” A retologa a lebelela lebati leo le bulegilego. “Aowa ruri,” a realo, “selo se sengwe goba motho yo mongwe o tsene a utswa dijo tša gago.” O tswaletše lebati la ka pele a le notlela.

Ka nako yeo ke ge mpšanyana e kitimetše ka tšhengwaneng ka morago. E hweditše lebati la morala le bulegile ya tsena ka gare. Phapoši ka moka ga yona e be e tletše monkgo wa dijo wa bose. Godimo ga tafola ka moraleng go be go na le pitša ye kgolo le poleiti ye nngwe ya di-noodles. Mpša e ile ya fofela setulong gape ya tsenya sefahlego poleiting gomme ya thoma goja.

Ka nako yeo mosetsana le mmagwe ba tsena ka moraleng.

“Go diragalang?” gwa goeletša mmago mosetsana.

Mpšanyana e be e tšhogile kudu; e tsene khoneng gomme ya lla.

“Re tla dira eng ka wena? O ditšhila KUDU,” a realo mosadi.

“Aa,” a realo mosetsana, “molomo wa gago o sa tletše di-noodles!”

“Tswalela lebati,” a realo mmagwe. “Re tla ja gomme ge re fetša ra e hlapiša.” Ba dirile fela bjalo.

“Bjale,” a realo Koko, “ke mang yo a ka akanyago gore mpša ba e filwe leina lefe?”

“NOODLE!” gwa goeletša Bella le Neo.

“Ee,” a realo Koko. “Naa o tseba gore batho ba ka kanegelong e be e le bomang?”

“Bella le mmagwe,” gwa goeletša Afrika.

“KE NNAAAAA!” gwa goeletša Bella. Neo a sega.

“Efela seo ga se mafelelo a kanegelo,” a realo Koko. “Bella o ile a swanela go nyakišiša ge eba mpšanyana e na le mong. O tla ipha yona, ge fela a ka se hwetše mong wa yona. Ka moso Bella le mmagwe ba tsene motse le motsana ba botšiša batho bohle ge eba mpšanyana ke ya mang. Efela ga go yo a kilego a e bona pele ga nako yeo. Bella ge a le tseleng o kopane le MmagoAfrika le …”

“NNAAAA!” gwa goeletša Afrika.

“Ee,” a realo Koko, “ka moka le kopane le Noodle. Ke ka moo ka moka le bilego bagwera ka gona gomme Noodle ya ba mpša ya Bella, ka gobane e be e se na mong.”

“Ke mpša ya botse ya go loka kudu lefaseng lohle,” a realo Bella.

“Gomme re bagwera ba bagolo lefaseng lohle,” a realo Neo.