Isisekelo sempilo
Isisekelo sempilo ukudl’ okusha, Okutshal’ engadini yemifino, Nasengadini yezithelo, Imifin’ ethelel’ enhlabathini, Nemifin’ ethelele ngaphezulu. Imifin’ ekhiwe kahle, Ibuy’ iphekwe kahle, Yiyon’ enempilo enhle. Izithel’ ezikhiwe kahle, Zadliwa zisekahle, Yizon’ ezinempil’ enhle. Ukuze sikhule thina bantwana, Siding’ ukudl’ okusekusha. Siding’ imifino nezithelo. Ukuze sikuthole sikudle, Kumele sisebenze siqine, Selekelel’ abazali bethu Ekutshaleni nasekuhlakuleni.
Sinekhaya
Thina sinekhaya, Lapho singabakhona, Lapho sihlala khona, Sihlala singumndeni, Umndeni othandanayo, Umnden’ othembanayo. Sonke sinelinye ikhaya, Ikhaya elingedluli, Esothi sonke singedlula, Kulo mhlaba sidlulele kulona. Sihlale kulona unomphela, Sithokoze kuze kube phakade.
Amazinyo ami
Amazinyo ami, Angubuhle bami, Ngihleka ngawo, Ngidla ngawo, Ngimuhle ngawo. Amazinyo ami Ngiyawanakekela, Ukuz’ ahlal’ ephilile. Ngiyawaxubha njalo, Ukuze angaboli, Abolise umlomo. Amazinyo ami Ahlolwa udokotela Ezinyangeni eziyisithupha. Anezimbobo ayagcwaliswa, Abolile ayakhishwa. Ngiyawathanda, ngiyawanakekela Amazinyo ami.
Yaqhamuka inyoni
(Abahayayo bangalingisa ngokuhambisana nomlolozelo. Lapho bethi: “Bhengu! Bhengu!” bangashaya imizimba ngezindololwane ukulingisa ukubhula amaphiko. Lapho bethi “Kunyonini lokhuya” bangabheka phezulu bakhombe.) Yaqhamuka inyoni, Yandizela phezulu, Yabhula amaphiko: Bhengu! Bhengu! Yandiza, Yandizela phezulu. Kunyonini lokhuya Okundizela phezulu? Kufana noheshane, Inyon’ edliz’ inkukhu. Izinkukhu zonkana, Zisala ziphithiza, Zizihlom’ ezingcingweni. Selokhu zazingelwa Amakhosi oheshane, Zakubon’ okukhulu, Zakubeleth’ emhlane!
Yebuya hobhe
(Kungaba namaqembu amabili: elinye liyaphawula libuze, elinye liphendule. kanti bangahlangana bonke, babuze, babuye baphendule.) Yebuya hobhe, Uy’ uphetheni? Ngiya ngipheth’ inyama. Uya kuyosaphi? Ngiyakuyos’ endle. Ekhaya kunani? Ngesaba obaba, Bazongiphuca, Bangiphuc’ idevu, Lomnt’ omdala. Ngiyalesaba, LinjengoBholobha, Ehlez’efusini, Ethi: Maye!Maye! Kazi ngoshonaphi! Ngoshona kobaba, EMgungundlovu. Bangiph’ ucwephe, Lukhuhl’ izilwane, ZakwaMasasa. Masasa vuka! Ngivuke kanjani Ngibulewe nje […]
Imvula
Woza we mvula, Uzosithela we! Ngawo amathonsi Abandayo qa! Siyakuthanda Thina bantwanyana Uma sidlala Ucabhayiyane, Co! Co! Ucabhayiyane. Umoya uyasitshela Uma usuzofika. Kugcwale imifula, Kugcwale imihosha. Siyowelaphi na? Solal’ ezihlahleni, Sidle izindoni.
Thula, thula, mntwana
Thula, thula, mntwana, Umama akekho, Uyothez’ inkuni, Sizophuz’ incumbe Um’esebuyile, Thula, thula, Thula, mntwana!
Nansi inunu iza
Nans’ inunu iza, Ihuba icasha, Izolum’ ingane Ingane kamama, Ngob’ ikhala, Ikhalel’ ubala. Casha wena ngane, Uthul’ uthi du! Uthul’ uthi du!
Mina ngiyithiphothi
(Kungahambisana nokwenziwa ngezandla. Emgqeni 2, isandla singamiswa okomlomo wethiphothi, kuthi emgqeni 4 isandla noma ingalo igotshwe njengesibambo sethiphothi. Emigqeni 4 no-5 kungalingiswa ukuphuma kwamanzi ethiphothini eya enkomishini.) Mina ngiyithiphothi. Lo umlomo wami, Les’ isandla sami, Ngithele bo! Ngithele bo!
Umzanyana uthi
(Lapha u-A, angashiwo ngumuntu oyedwa noma iqembu A. Ku-B, kwenanela abeqembu B.) We Nokuthula! Wu! Wu! Wu! Igula lomntwana: Wu! Wu! Wu! Zaqheqhe zengane: Wu! Wu! Wu! We Nomsutho! Wu! Wu! Wu! Woz’ uthule: Cha, cha, cha, bo!